Ўзбекистон 2025 йил декабрь ойи ҳолатига кўра, Speedtest Global Index мобил интернет тезлиги рейтингида 76-ўринни эгаллади.
Қайд этилишича, ноябрь ойига нисбатан мамлакат 5 поғонага пастлади. Мобил интернет тезлиги 51,47 мегабит секунд деб баҳоланган. Ўтган йил июнь ойида рейтингда мамлакат 103 давлат ичида 71-ўринда эди. Унда МДҲ давлатларида Қозоғистон биринчи ўринда бўлган.
Шунингдек, симли интернет тезлиги ҳам ёмонлашиб, республика 77-ўриндан 83-поғонага тушди. Бунда ўртача тезлик 90,94 мегабит секунд бўлган.
Энг тез мобил интернет Бирлашган Араб Амирликларида мавжуд бўлиб, 691,76 мегабит сонияни ташкил этган. Симли интернет тезлигида эса Сингапур етакчилик қилмоқда. Давлатда симли интернет 410,06 мегабит секунд тезликда ишлайди.
2025 йилнинг сентябрь ойида Самарқанд ва Қўқон шаҳарлари интернет тезлигида Тошкентни ортда қолдирган.
Вилоятлар кесимида ҳам Самарқандда бошқа ҳудудлардан юқорироқ тезлик қайд этилган. Кейинги ўринларда — Бухоро ва Навоий ҳудудлари бўлган.
