Қирғизистон расмийлари мамлакат телеканалларига контентнинг камида 60 фоизини қирғиз тилида олиб бориш бўйича талаб қўйди. Бу ҳақда маданият, ахборот ва ёшлар сиёсати вазири ўринбосари Марат Тагаев телекомпаниялар вакиллари билан ўтказилган йиғилишда маълум қилди.
Унга кўра, амалдаги қонунчилик талабларига мувофиқ, рус тилидаги контент улуши эфирнинг 40 фоизидан ошмаслиги керак. Тагаев айрим хусусий телеканаллар бу талабни фақат расмиятчилик учун бажариб, ўн йиллар аввал тайёрланган қирғиз тилидаги дастурларни қайта-қайта эфирга узатаётганини айтди. У, шунингдек, янги миллий контент яратилмаётганини танқид қилди.
“Биз хусусий телеканаллар фаолиятига тўсқинлик қилмаймиз. Аммо қонун, айниқса давлат тилига оид меъёрлар қатъий бажарилиши шарт. Томошабинлар ҳуқуқларини ҳимоя қилиш бизнинг мажбуриятимиздир”, деган вазир ўринбосари.
Учрашувда маълум қилинишича, “Қирғизфилм” ва “Қирғизсериал” фондлари томонидан тайёрланган 400 дан ортиқ бадиий фильм, 40 та мультфильм ва 10 та сериал телеканалларга бепул тақдим этилган. Жорий йил февраль ойининг охиригача ушбу муассасалар билан шартнома тузиб, қирғиз тилидаги контент билан таъминлаш белгиланган. Акс ҳолда, йил охирига бориб телеканалларга нисбатан чора кўрилиши мумкин.
Қирғизистонда давлат тилидан фойдаланиш тўғрисидаги қонунга ўзгартиришлар 2025 йилнинг август ойида киритилган. Унгача телеканаллардан эфир вақтининг камида 50 фоизини қирғиз тилида олиб бориш талаб этилганди.
Маълумотларга кўра, ҳозирда Қирғизистонда 42 та телеканал фаолият юритади. Улардан иккитаси НТРК ва ЭЛТР давлат томонидан молиялаштирилади. Шунингдек, “Мир” халқаро телеканали ҳам бюджет ҳисобидан субсидиялар олади. Мамлакат 2026 йилда теле ва радиоэшиттиришларни молиялаштириш учун 1,67 млрд сом (тахминан 19,1 млн доллар) ажратиши кутилмоқда.
