Наманган шаҳрида кўча безорилиги билан шуғулланиб, фуқароларга босим ўтказиш орқали ноқонуний фаолият юритиб келган “Эшон” лақабли шахс ушланди. Бу ҳақда вилоят Ички ишлар бошқармаси ахборот хизмати хабар берди.
Аниқланишича, қўлга олинган 28 ёшли Баҳриддин Насриддинов муқаддам Жиноят кодексининг 277-моддаси биринчи ва иккинчи қисмлари, 168-моддаси тўртинчи қисми ҳамда 228-моддаси учинчи қисми билан судланган бўлган.
Шунга қарамай, у атрофида жиноят содир этишга мойил шахсларни тўплаб, улар билан тил бириктирган ҳолда Наманган шаҳрида товламачилик ва безорлик ҳолатларини содир этиб келган. Гумонланувчи фуқаролар ўртасидаги пул олди-берди масалаларини куч ишлатиш йўли билан “ҳал қилиб бериш” орқали ноқонуний даромад орттирган.
Тергов материалларига кўра, Баҳриддин Насриддинов жиноий шериклари билан биргаликда Наманган шаҳрида яшовчи танишини “Баркамол авлод” маҳалласи ҳудудига чақириб, уни “кўча ечимларида иштирок этмаётгани” ва чақирилган пайтда келмаётгани каби баҳоналар билан айблаган. Шундан сўнг фуқаронинг баданига қўли ва ўткир кесувчи жисм билан уриб, унга тан жароҳати етказган.
Наманган вилояти суд-тиббий экспертизаси хулосасига кўра, жабрланувчининг чап елка қисмида кесилган ва санчилган жароҳатлар аниқланган. Маълум бўлишича, ўзини “Эшон” лақаби билан танитиб, гўёки “кўча ишларини ҳал қилувчи” сифатида танилган ушбу шахс фуқароларга босим ўтказиш орқали ноқонуний фаолият юритиб келган.
Мазкур ҳолат юзасидан гумонланувчи процессуал тартибда қўлга олинган. Наманган шаҳар ички ишлар бошқармаси ҳузуридаги тергов бўлими томонидан унга нисбатан Жиноят кодексининг 277-моддаси учинчи қисми билан жиноят иши қўзғатилган бўлиб, ҳозирда дастлабки тергов ҳаракатлари олиб борилмоқда.
Ички ишлар органлари мазкур шахсдан жабр кўрган фуқароларни Наманган вилояти ички ишлар бошқармасига, ҳудудий ички ишлар органларига ёки 102 қисқа рақами орқали мурожаат қилишга чақирди. Мурожаат қилган шахсларнинг маълумотлари сир сақланиши кафолатланади.
