Тошкент шаҳар Ички ишлар бош бошқармаси ҳамда Давлат хавфсизлик хизматининг пойтахт бўйича бошқармаси ҳамкорлигида ноқонуний қурол савдоси ва ўқ-дориларни сақлаш ҳолатлари юзасидан тезкор тадбирлар амалга оширилди.
Рейд давомида пойтахтнинг Чилонзор туманида яшовчи Мирмаҳмуд исмли шахснинг хонадони холислар иштирокида кўздан кечирилди. Олинган тезкор маълумотлар асосида ўтказилган текширувда фуқаро яшаш жойида тегишли рухсат ҳужжатларисиз ов қуролини сақлаб келгани аниқланди. Мазкур ҳолат юзасидан Ўзбекистон Республикаси Жиноят кодексининг 248-моддаси билан жиноят иши қўзғатилди.
Яна бир ҳолат Учтепа туманида аниқланган. Суннат исмли фуқаро билан олиб борилган суриштирувларда у амакисининг уйини таъмирлаш жараёнида пол остидан икки дона қутида жами 100 дона ўқ-дори топиб олгани маълум бўлди. Фуқаро ушбу ўқ-дорилар марҳум амакисига тегишли бўлганини билдириб, уларни ихтиёрий равишда ички ишлар органларига топширди. Топилган далилий ашёлар Тошкент шаҳар Ички ишлар бош бошқармасининг эксперт-криминалистика марказига юборилди ва экспертиза хулосасига кўра қонуний қарор қабул қилиниши белгиланди.
Навбатдаги ҳолат Сергели туманида жойлашган страйкбол клубида қайд этилди. Тезкор тадбир давомида Рустам исмли шахс бир дона газ пистолети, икки дона газ балони, махсус пружина, 4000 дона махсус ўқдон ва ўқлар ҳамда ССГ10 русумли узун стволли пневматик қуролни 2000 доллар эвазига сотаётган вақтида ушланди. Холислар иштирокида қуроллар ва пул маблағлари ашёвий далил сифатида расмийлаштирилди.
Шунингдек, ушбу жойда тегишли рухсатномаларсиз сақланиб келинаётган 11 дона турли русумдаги газли пистолет ва олти дона узун стволли пневматик қурол аниқланиб, текширув учун олиб қўйилди. Ҳозирда мазкур ҳолатлар юзасидан терговга қадар текширув ҳаракатлари олиб борилмоқда. Ҳуқуқни муҳофаза қилувчи органлар томонидан ноқонуний қурол муомаласига қарши тезкор тадбирлар давом эттирилмоқда.
