Тошкентда ҳавони ифлослантирган қурилиш объектларида иш тўхтатилиб, 70 киши жаримага тортилди. Бу ҳақда Экология ва иқлим ўзгаришлари миллий қўмитаси хабар қилди.
Қайд этилишича, пойтахтнинг 12 та туманидаги 96 та қурилиш объектида 140 нафар ходимни жалб қилган ҳолда ўрганиш ишлари ўтказилган.
Тадбирлар натижасида, 60 та ҳолатда ҳавонинг чанг ва қум билан ифлосланишининг олдини олиш бўйича мажбурий талаблар бузилгани, 47 та ҳолатда қурилиш майдонининг 25 фоизини кўкаламзорлаштириш бўйича талаб бажарилмагани маълум бўлди.
Атмосферани ифлослантирган 15 та объектда қурилиш ишлари вақтинча тўхтатилган бўлиб, 70 киши маъмурий жавобгарликка тортилган, шунингдек, 68 нафар шахс расмий огоҳлантирилган.
Шу билан бирга, 24 та объектда сув ювиш мосламалари ўрнатилиши таъминланиб, 62 тасида автомашина шиналарини ювиш учун бассейнлар яратилгани билдирилди.
Тошкент вилоятида ҳам атмосфера ҳавосига зарар етказаётган корхоналар аниқланиб, уларнинг фаолияти тўхтатилгани хабар қилинганди.
