Мадриднинг “Реал” ҳужумчиси Килиан Мбаппе ўзини португалиялик футболчи Криштиану Роналду билан таққосланишига муносабат билдирди.
Франциялик футболчи 26 ноябрь, чоршанба куни Грециянинг “Олимпиакос” жамоасига қарши ўйинда (4:3) тўртта гол урди. Ўйиндан кейин журналистлар Мбаппе номини Чемпионлар Лигаси ва “қироллик клуби” тарихидаги энг яхши тўпурар Роналду билан боғлашди.
“Роналду? Мен ‘Реалъда унинг даражасига етишиш учун ҳали узоқ йўл босишим керак”, дейди 26 ёшли ҳужумчи.
Шунингдек, Мбаппе “Реал”нинг сўнгги ўйинлардаги омадсиз натижалари ҳақида ҳам фикр билдирди:
“Биз ўзимизни, мураббийимизни ва ходимларимизни ҳимоя қилишимиз керак. Мадридликлар ҳис қилиши лозимки, биз биргамиз ва барчамиз бир йўналишда ҳаракат қиляпмиз. Кемада бўлгани каби жамоамиз ҳам тўфонлар билан дуч келиши мумкин, лекин ҳеч ким кемадан сакрамайди. Биз барчамиз бирга бўлиб, йил давомида чемпионликни қўлга киритишга интиламиз”, дейди франциялик форвард.
Маълумот учун, Килиан Мбаппе ушбу мавсум Чемпионлар Лигаси тўпурарлар рўйхатида етакчи бўлиб турибди. Франциялик ҳужумчи 5-турдан кейин тўққизта гол урган. “Реал Мадрид” ҳозирда ЕЧЛ турнир жадвалида 12 очко билан 5-поғонани банд этган.
