Тошкентнинг Яшнобод туманида 34 ёшли аёл Lacetti уриб юбориши оқибатида вафот этди. Бу ҳақда 3 январь куни пойтахт ЙҲХБ матбуот хизмати хабар берди.
Маълум қилинишича, ЙТҲ 2025 йил 31 декабрь куни соат 21:00 ларда Махтумқули кўчасида содир бўлган. 2005-йилда туғилган Ж.Р. Lacetti автомашинасини бошқариб кетаётиб, йўлнинг белгиланмаган жойидан кесиб ўтаётган пиёда — 1991-йилда туғилган Й.Н.ни уриб юборган. Оқибатда пиёда олган тан жароҳатларидан воқеа жойида вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган. Айни пайтда тергов ҳаракатлари давом этмоқда.
Ушбу моддага кўра, бундай қилмиш одам ўлишига сабаб бўлса, айбдор шахс муайян ҳуқуқдан маҳрум қилиниб, 7 йилгача озодликдан маҳрум қилиш билан жазоланади.
