Покистон 21 февраль куни кечаси Афғонистонда жангариларга қарши бир неча ҳаво ҳужумларини амалга оширганини маʻлум қилди. “Толибон” ҳужумлар оқибатида ўнлаб одамлар ҳалок бўлгани ва яралангани, улар орасида болалар ҳам борлигини таʻкидлади. Бу ҳақда The Guardian хабар берди.
Покистон ҳужумлар қайси ҳудудларда амалга оширилгани ва бошқа тафсилотлар ҳақида аниқ маълумот бермаган. Бироқ жангариларнинг “лагерлари ва бошпаналари” нишонга олинганини маʻлум қилган.
Кеча (21 февраль) тунда улар Нангарҳор ва Пактика вилоятларида тинч фуқароларимизни бомбардимон қилиб, ўнлаб одамларни, жумладан, аёллар ва болаларни ўлдирди ва ярадор қилди, деди “Толибон” матбуот котиби Забиҳуллоҳ Мужоҳид.
Покистон ахборот вазири Аттауллоҳ Тарар эса ҳарбийлар “Таҳрики Толибон Покистон” (ТТП) ва унга алоқадор гуруҳларга тегишли еттита лагерга қарши “разведка маʻлумотига асосланган, аниқ йўналтирилган операциялар” ўтказганини айтди. У чегара ҳудудида ИШИД шўбаси ҳам нишонга олинганини таʻкидлади.
Тарор Покистон “минтақада тинчлик ва барқарорликни сақлашга доимо интилиб келганини” таъкидлади. Бироқ Покистон фуқароларининг хавфсизлиги ва ҳимояси энг устувор масала бўлиб қолишини айтди. Афғонистон Мудофаа вазирлиги эса ҳужумни қоралаб, Покистонга муносиб ва ўз вақтида жавоб қайтарилишидан огоҳлантирди.
Мудофаа вазирлиги Афғонистон миллий суверенитетининг бу очиқдан-очиқ бузилишини ва мазкур жиноятни қатъий қоралайди. Вазирлик буни халқаро ҳуқуқ, яхши қўшничилик тамойиллари ва исломий қадриятларнинг бузилиши деб баҳолайди, дейилади расмий баёнотда.
Сўнгги воқеалар бир неча кун аввал Покистонда содир этилган йирик теракт ортидан юз берди. Афғонистон билан чегарадош Хайбар-Пахтунхва вилоятининг шимоли-ғарбидаги Бажаур туманида худкуш террорчи портловчи моддаларга тўлдирилган автомобильни хавфсизлик пости деворига бориб урган. Портлаш оқибатида бинонинг бир қисми қулаб тушиб, 11 нафар ҳарбий ва бир нафар бола ҳалок бўлган. Расмийлар кейинчалик худкуш террорчи Афғонистон фуқароси бўлганини маълум қилди.
21 февраль кунги авиаҳужумдан сўнг Покистон ҳарбийлари “ҳеч қандай тийилиш кўрсатмаслигини” ва айбдорларга қарши операциялар “қаерда бўлишидан қатъи назар” давом этишидан огоҳлантирди.
Покистон ахборот вазири мамлакатда яқинда содир этилган ҳужумлар, жумладан, февраль ойида Исломободдаги шиалар масжидига уюштирилган ва 31 нафар одамни ўлдирган худкуш ҳужуми “Афғонистондаги раҳбарияти ва кўрсатма берувчилар буйруғи билан” ҳаракат қилган жангарилар томонидан амалга оширилгани ҳақида “аниқ далиллар” борлигини таʻкидлади.
Покистон халқаро ҳамжамиятни “Толибон” ҳукуматига ўз тупроғидан бошқа давлатларга қарши фойдаланишга йўл қўймаслик бўйича Доҳа келишуви доирасидаги мажбуриятларини бажаришга босим ўтказишга чақирган.
Покистонда сўнгги йилларда жангарилар зўравонлиги кучайиб бормоқда, уларнинг аксарияти ТТП ва Балужистон сепаратист гуруҳлари билан боғлиқ. 2021-йилда “Толибон” ҳокимиятга қайтгач, Покистон ТТП жангарилари Афғонистон ҳудудидан туриб ҳаракат қилаётганини даъво қилмоқда. Бу айбловни гуруҳнинг ўзи ҳам, Афғонистон ҳукумати ҳам рад этиб келмоқда.
