Афғонистон молия вазирлиги бош вазирнинг иқтисодий масалалар бўйича ўринбосари кўрсатмасига асосан, 9 февралдан бошлаб мамлакатнинг барча божхона пунктларида Покистон дори-дармонлари импорти бутунлай тўхтатилишини эълон қилди. Бу ҳақда Тоlо News хабар берди.
19 кунлик муҳлат
Вазирликка кўра, Покистондан дори воситаларини олиб кирувчи тадбиркорларга ўз операциялари ва ҳужжат ишларини тўлиқ якунлаш учун 19 кун вақт берилган. Молия вазирлиги матбуот котиби Абдул Қаюм Носир мавзу юзасидан қуйидагиларни маълум қилди:
“Молия вазирлиги Покистондан дори-дармон импорт қилувчи барча тадбиркорларни ҳурмат билан яна бир бор огоҳлантиради: транзаксиялар ва ҳужжатларни расмийлаштиришни якунлаш учун сизда 19 кун бор. Шаъбон ойининг 21-куни (9 февраль)дан кейин мамлакатнинг ҳеч бир божхона пунктида фармацевтика маҳсулотлари расмийлаштирилмайди”.
Сифатсиз дори-дармонлар ва эътироз
Кобул аҳолиси ва мамлакат фуқаролари ушбу қарорни қўллаб-қувватламоқда. Кўпчиликнинг фикрича, Покистондан келтирилаётган дориларнинг сифати талабга жавоб бермайди.
“Ўтган йиллар давомида Покистондан импорт қилинган дорилар ҳатто янги касалликларни келтириб чиқарди. Ушбу тақиқ — яхши қадам ва биз буни олқишлаймиз”, деди Кобул маҳаллий вакилларидан бири Абдул Қодир.
Яна бир респондент Ҳамидуллонинг таъкидлашича:
“Афғонистонда ишлаб чиқарилган дорилар сифатли бўлиши шарт. Савдогарларни фармацевтика секторига сармоя киритишга ундаш керак, шунда биз бошқа давлатларга қарам бўлиб қолмаймиз”.
Афғонистон Соғлиқни сақлаш вазирлиги ички бозорда дори-дармон танқислиги юзага келмаслигига ва эҳтиёж маҳаллий ишлаб чиқариш ҳисобига тўлиқ қопланишига ишонтирмоқда. Мазкур кескин қарор Покистон томонидан бошланган низолар сабабли савдо йўллари ёпилиши ортидан қабул қилинди.
Шу муносабат билан бош вазирнинг иқтисодий масалалар бўйича ўринбосари Мулла Абдул Ғани Бародар афғон тадбиркорларини муқобил импорт йўлларини топишга ва Покистон билан барча шартномаларни, айниқса фармацевтика соҳасидаги келишувларни бекор қилишга чақирмоқда.
