“Тошкент вилояти сув таъминоти” АЖнинг Пискент тумани филиали раҳбари бошқа шахслар билан тил бириктириб, 3 млрд сўмлик қувурларни талон-торож қилди. Бу ҳақда Коррупцияга қарши курашиш агентлиги хабар берди.
Маълум қилинишича, масъул ташкилот ходимлари Пискент тумани “Гулистон” МФЙ ҳудудида жойлашган “Сағанак” сув иншоотини Пискент туман сув таъминоти филиали балансига ўтказиш объектида бажарилган қурилиш-монтаж ишлари ҳажми назорат ўлчовидан ўтказилган.
Ўрганишлар давомида “Тошкент вилояти сув таъминоти” АЖнинг Пискент тумани филиали раҳбари Б.К., “А” АЖ мансабдор шахслари ва бошқалар билан олдиндан жиноий тил бириктирган ҳолда умумий қиймати 3 млрд 931,2 млн сўмлик сув қувурларининг 3 млрд 78,4 млн сўмлик қисми, яъни жами 14 800 метрини қазиб олиб, ўзлаштириш йўли билан талон-торож қилгани аниқланган.
Қайд этилган ҳолатлар юзасидан “Тошкент вилояти сув таъминоти” АЖнинг Пискент тумани филиали раҳбари Б.К., ”А” АЖнинг мансабдор шахслари ҳамда бошқаларга нисбатан Иқтисодий жиноятларга қарши курашиш департаментининг Тошкент вилоят бошқармаси томонидан Жиноят кодексининг 167-моддаси 3-қисми (ўзлаштириш ёки растрата йўли билан талон-торож қилиш) “а” банди билан жиноят иши қўзғатилган.
