Тошкент халқаро аэропортида 24 ёшли аёл алдов йўли билан бир фуқарони Дубайга олиб кетаётган вақтда тўхтатиб қолинди. Бу ҳақда Давлат ҳавфсизлик хизмати хабар берди.
Маълум қилинишича, Давлат ҳавфсизлик хизмати Тошкент шаҳар бўйича бошқармаси ходимлари томонидан Ички ишлар органлари билан ҳамкорликда тезкор тадбир ўтказилган.
Айтилишича, ушбу аёл пойтахт ҳудудида қизларни хорижий давлатларга жинсий эксплуатация қилиш учун юбориш билан шуғулланувчи жиноий гуруҳ вакили ҳисобланган.
Ҳабарга кўра, 2002 йилда Тошкент вилоятининг Бўстонлиқ туманида туғилган аёл 4 нафар қизларни алдов йўли билан ёллаган. Шундан сўнг улардан бирини ўзи билан бирга Дубай шаҳрига олиб кетаётган вақтида тезкор ходимлар томонидан тўхтатиб қолинган.
Ҳолат юзасидан ушбу аёлга нисбатан Жиноят кодексининг 135-моддаси (одам савдоси) 2-қисми “з” банди билан жиноят иши қўзғатилган. Шунингдек аёлга “қамоқ” эҳтиёт чораси қўлланилган. Ҳозирда тергов ҳаракатлари олиб борилмоқда.
Маълумот учун, амалдаги қонунчиликка мувофиқ, бу турдаги жиноятлар учун 5 йилдан 10 йилгача озодликдан маҳрум қилиш жазоси белгиланиши мумкин.
