Владимир Путин ҳамда Си Цзиньпин 20 май куни Пекин шаҳрида музокаралар ўтказди.
Маълум қилинишича, музокараларнинг биринчи қисми Тяньаньмэнь майдонида жойлашган Халқ йиғинлари залида чекланган форматда бўлиб ўтган ва тахминан бир ярим соат давом этган. Россия оммавий ахборот воситалари хабарига кўра, шундан сўнг делегациялар музокараларни кенгайтирилган форматда давом эттирган.
Синьхуа маълумотига кўра, учрашув давомида Си Цзиньпин халқаро вазият беқарор ва нотинч бўлиб қолаётганини, шунингдек “бир томонлама ҳаракатлар ва гегемонлик” кучайиб бораётганини таъкидлаган.
Унинг сўзларига кўра, Хитой ва Россия икки мамлакатнинг “ривожланиши ва тикланишини рағбатлантириши”, шунингдек “глобал бошқарув тизимини янада адолатли ва оқилона қилишга интилиши” керак.
Владимир Путин эса Москва ва Пекин ўртасидаги кенг қамровли шериклик “янги даврда давлатлараро муносабатлар намунасига айлангани” ва икки мамлакат ўртасидаги муносабатлар “бир неча бор мустаҳкамлик синовидан ўтгани”ни айтган.
Шунингдек, бир ҳафта аввал — 14 май куни Си Цзиньпин Пекинда Дональд Трамп билан ҳам музокара ўтказгани қайд этилди.
Financial Times хабарига кўра, ушбу учрашув давомида Хитой раҳбари Путин Россиянинг Украинага бостириб киришидан “охир-оқибат афсусланиши мумкинлиги”ни айтган. Бироқ Хитой Ташқи ишлар вазирлиги Financial Times тарқатган маълумотни “соф уйдирма” деб атаган.
