Россия Президенти Владимир Путин ҳали ҳам Анкориж саммитида келишиб олинган муайян ён беришларга тайёр. Бу ҳақда у кеча, 25 декабрь куни Давлат кенгаши йиғилишида маълум қилди.
Украинанинг “Страна” нашри ва бошқа ОАВларнинг аввалги хабарларидан келиб чиқиб, гап Кремль 2022 йил кузида оккупация қилинган ҳудудларда ўтказилган “референдумлар” натижасида Россия таркибига киритилган деб эълон қилинган Запорожье ва Херсон вилоятларидан Украина қўшинларини чиқиб кетиши талаби қўйилмаслиги ҳақида кетмоқда.
“Коммерсанть” маълумотларига кўра, Давлат кенгаши йиғилишида Путин асосан АҚШ ва Украина билан урушни тўхтатиш режаси бўйича олиб борилаётган музокаралар ҳақида гапирган. Жумладан, у “Россия томонидан ҳам ҳудудларни қисман алмашиш истисно этилмайди”, деб айтган.
Шу билан бирга, Путин “Краматорск–Константиновка–Славянск (Украинанинг Донецк вилоятидаги) тугунининг қайси давлатга тегишли экани масаласи муҳокама қилинмайди”, деб алоҳида таъкидлаган.
Владимир Путиннинг сўзларига кўра, ҳозир Россия ва АҚШ Запорожье атом электр станциясини (ЗАЭС) қўшма бошқариш масаласини муҳокама қилмоқда. Айтишича, АҚШ томони станцияда майнинг билан шуғулланиш имкониятига қизиқиш билдирган, шунингдек, Украинага электр энергияси етказиб бериш масаласини кўтарган.
Украиналик мутахассислар ЗАЭСда ишлаши мумкинми, деган саволга Путин улар ҳозир ҳам у ерда эканини, “фақат эндиликда уларнинг паспортлари Россияники”, деб жавоб берган. Шунингдек, у европалик етакчилар билан музокаралардан сўнг АҚШ айрим таклифларидан “чекинганини” айтган ва буни заифлик белгиси деб баҳолаган.
Бугун, 26 декабрь куни эрталаб Украина Президенти Владимир Зеленский яқин орада АҚШ Президенти Дональд Трамп билан учрашишини маълум қилди.
“Бир кунни ҳам йўқотмаяпмиз. Энг юқори даражада – Президент Трамп билан – яқин вақтда учрашув бўйича келишиб олдик. Янги йилгача кўп нарса ҳал бўлиши мумкин”, деб ёзди у ўзининг Telegram-каналида.
Украинанинг “The Kyiv Post” газетаси манбаларидан бирига кўра, агар барча режа бўйича кетса, учрашув 28 декабрь куниёқ бўлиши мумкин. Ноябрь ойи охирида Дональд Трамп Зеленский ва Путин билан фақат тинчлик келишуви “якунланган ёки якуний босқичда бўлган тақдирдагина” учрашишга тайёр эканини айтган эди.
