Германия канцлери Фридрих Мерс Россия президенти Владимир Путинни нацистлар етакчиси Адолф Гитлерга қиёслаб, агар Украина мағлуб бўлса, уруш шу билан тўхтамаслиги ҳақида огоҳлантирди. Бу ҳақда у 13 декабрь куни партия қурултойида сўзлаган нутқида маълум қилди.
Мерс ўз чиқишида тарихдан параллел ўтказиб, 1938-йилги воқеаларни эслатди. Ўшанда Франция ва Буюк Британия урушнинг олдини олиш учун Чехословакияга шарт қўйиб, Судет вилоятини Германияга топширишга мажбурлаган эди. Бироқ бундай қадам Гитлернинг тажовузкор ниятларини тўхтатмади.
Натижада орадан кўп ўтмай, аниқроғи 1939 йил март ойига келиб фюрьер барча ваъдаларни бузди. Германия Чехословакиянинг қолган ҳудудларини ҳам босиб олди. Бу эса алал-оқибат Иккинчи жаҳон урушига олиб келган воқеаларни бошлаб берди.
Канцлернинг таъкидлашича, Донбассни Россияга бериш Путиннинг амбицияларини қондиради, деган фикр айнан шу тарихий тажриба сабаб ҳам хатодир. Унга кўра, 1938 йилдаги Мюнхен келишуви Гитлерни тўхтатмагани каби, Россияга ҳудудий ён бериш ҳам Путинни тўхтатмайди.
Мерс 2014 йилдан сўнг бошланган воқеаларни Россиянинг Украинага, умуман олганда, Европага қарши тажовузкор уруши деб атади. Шунингдек, у агар Украина мағлуб бўлса, можаро шу билан якунланмаслигини қайд этди. Канцлернинг айтишича, Гитлер учун Судет ҳудуди етарли бўлмагани каби, Путин ҳам Донбасс билан тўхтаб қолмайди.
Германия канцлерининг мазкур баёнотидан бир неча соат ўтиб Украина президенти Берлинга келди. У АҚШ президентининг махсус вакиллари, шунингдек Европа мулозимлари билан Оқ уй таклиф қилган тинчлик келишуви шартларини муҳокама қилади.
