Германия ҳукумати Исроил армияси Ғазода фойдаланиши мумкин бўлган қуролларни етказиб беришга қўйилган августдаги тақиқни бекор қилди. Қарор 24 ноябрдан кучга киради. Бу ҳақда ҳукумат вакили Стефан Корнелиусга хабар берди.
Чекловларнинг бекор қилиниши 10 октябрдан бери амалда бўлган Исроил ва ҲАМАС ўртасидаги ўт очишни тўхтатиш режими “сўнгги ҳафталарда барқарорлашгани” билан изоҳланди. Шу билан бирга, Германия энди ҳар бир етказиб бериш аризасини маъқулламайди, балки “қурол экспортининг ҳар бир ҳолатини алоҳида кўриб чиқишга қайтади ва воқеаларнинг кейинги ривожига жавоб беради”.
Корнелиус мамлакат минтақада мустаҳкам тинчлик ўрнатиш бўйича ишларни давом эттиришини ва Ғазо аҳолисига инфратузилмани тиклашда ёрдам беришини таъкидлади.
- Исроилнинг муносабати
Исроил ташқи ишлар вазири Гидеон Саар Берлиннинг қурол етказиб беришга “қисман эмбарго”ни бекор қилиш қарорини қўллаб-қувватлади.
“Мен бошқа ҳукуматларни ҳам Германия мисолида шунга ўхшаш қарорлар қабул қилишга чақираман”, деб ёзди у X ижтимоий тармоғидаги саҳифасида.
- Исроилга қурол етказиб беришга қўйилган чекловлар ва уларнинг танқиди
2023 йил 7 октябрда Ғазо секторида уруш бошлангач, Германия ҳукумати Исроилга ҲАМАС жангчиларига қарши курашда фаол ёрдам берди. 2025 йил 6 майгача амалда бўлган Олаф Шольц ҳукумати мамлакатга қарийб 500 миллион евролик қурол етказиб берди.
Фридрих Мерцнинг янги ҳукумати даврида таъминот кичикроқ ҳажмда давом этди. Германия Исроилнинг Ғазо секторидаги ҳарбий операциясини тез-тез танқид қила бошлади ва жанговар ҳаракатлар оқибатида юзага келган гуманитар фалокатга ишора қилди.
Мерц томонидан август ойида эълон қилинган эмбарго Исроил ҳукумати томонидан ҳам, Христиан-демократик иттифоқи (ХДИ)/Христиан-социал иттифоқи (ХСИ) блоки вакиллари томонидан ҳам танқид қилинди. Исроил бош вазири Биньямин Нетаньяху шу йўл билан “Германия терроризмни мукофотлаётганини” даъво қилди. ХДИнинг хавфсизлик масалалари бўйича эксперти Родерих Кизеветтер эса эмбаргони “Германиянинг қўпол сиёсий ва стратегик хатоси” деб атаганди.
