“Манчестер Сити” бош мураббийи Пеп Гвардиола кеча, 18 ноябрь куни бўлиб ўтган Каталония ва Фаластин ўртасидаги хайрия, ўртоқлик ўйини олдидан стадионни тўлдиришга чақирди ва бу учрашувнинг аҳамияти юқори эканини таъкидлади. Бу ҳақда RAC1 хабар берди.
“Бу рамзий ўйиндан кўра юқорироқ. Бугун ҳамма нарса аён ва бу қарама-қаршилик фонида фаластинликлар дунёнинг улар ҳақида ўйлаётган бир қисми борлигини кўришади”, дейди Гвардиола Каталониянинг RAC1 радиостанциясига берган интервьюсида.
Шунингдек, Гвардиола халқаро ҳамжамиятнинг Фаластин бўйича сусткашлигини кескин танқид қилди:
“Дунё Фаластинни ёлғиз қолдирди. Биз мутлақо ҳеч нарса қилмадик. У ерда туғилганликлари учун улар айбдор эмас. Биз бутун бир халқни йўқ қилинишига йўл қўйдик”, дейди мураббий.
Мураббий ҳукуматлар масаласида ҳам қатъий фикр билдирди:
“Ғазодаги қирғинларни ҳимоя қила оладиган одам тасаввуримга сиғмайди. Фарзандларимиз у ерда туғилгани учунгина ўлдирилиши мумкин. Мен раҳбарларга деярли ишонмайман. Улар ҳокимиятда қолиш учун қўлидан келган ҳамма нарсани қилади”.
Гвардиола учрашув бирдамликдан ташқари, муҳим ижтимоий хабардорликни кучайтиришига ишонади:
“Бундай рамзий ўйинлар огоҳликни оширади, лекин унинг ортида ҳаракат бўлиши ҳам керак. Бу футбол ўйини, лекин у Фаластинга қувонч олиб келишини истаймиз”, дейди Гвардиола.
Каталония ва Фаластин ўртасидаги халқаро ўртоқлик турнири 2:1 ҳисобида Каталония фойдасига якунланди. Маълумотларга кўра, “Олимпия” стадионида бўлиб ўтган учрашув учун 25 мингга яқин чипта сотилган.
