Германия Европада биринчи бўлиб ракеталарни аниқлашга мўлжалланган ўз сунъий йўлдош тизимини яратади. Бу ҳақда Германия қуролли кучлари (Бундесвер) космик кучлари қўмондони, генерал-маёр Михаэл Траут Financial Times нашрига берган интервьюсида маълум қилди.
Траутнинг айтишича, ҳозирда Европа космик кучлар ва технологиялар борасида АҚШга деярли қарам. Шу сабабли ракеталарни аниқлаш ва уларни тўхтатиш учун Германия ва Европага тегишли мустақил тизимлар яратишга эҳтиёж бор.
Шахсий сунъий йўлдош тизимини яратиш зарурати Россиянинг узоқ масофага учувчи “Орешник” баллистик ракетаси пайдо бўлгани билан боғлиқ. Ушбу ракета Украинага қарши камида икки марта қўлланган ва уни тутиб қолиш жуда қийин деб баҳоланмоқда.
“У Европанинг ракета учирилишини аниқлаш борасида қанчалик заиф эканини очиқ кўрсатди”, деб ёзди FТ.
“Германия мудофаа вазири Борис Писториус 2029-йилда урушга тайёр бўлиш ҳақида буйруқ берди. Аммо космосда биз, зарур бўлса, ҳозирданоқ жанг қилишга тайёр бўлишимиз керак”, деди Траут.
Россиянинг Украинада давом этаётган уруши туфайли Европага таҳдид солаётган ракета таҳдиди унинг учирилишини кузатишни “оператив устувор вазифа”га айлантирмоқда. Шу сабабли Германия “уларни аниқлаш сунъий йўлдош тизими ядросини яратишни режалаштирмоқда. Лойиҳа миллий характерга эга бўлиши прогноз қилинган.
“Аммо мамлакат бу борада Европанинг бошқа давлатлари билан ҳамкорлик қилишга очиқ”, деди генерал-маёр Михаэл Траут.
Европа космик агентлиги (ESA) бош директори Йозеф Ашбахер бу дастурда иштирок этиш бўйича музокаралар аллақачон олиб борилаётганини айтди. Шу пайтгача ESA коинотни фақат тинч йўл орқали ўзлаштириш билан шуғулланган. Аммо 2025-йили ташкилот аъзолари, жумладан, Европа Иттифоқи мамлакатларидан ташқари Буюк Британия, Норвегия ва Канада биринчи марта икки мақсадли дастурни молиялаштиришга келишиб олди.
“Германия билан ракеталарни космосдан кузатиш бўйича Европа миқёсидаги ягона тизимли инфратузилмани яратиш имкониятлари мунтазам муҳокама қилинмоқда”, деди Ашбахер.
