Буюк Британия, Италия, Польша, Франция ва Германия биргаликда кичик ҳамда арзон дронлар ишлаб чиқаришни бошлайди. Бу ҳақда Deutsche Welle хабар берди.
Бешта давлатларнинг мудофаа раҳбарлари дронлар ва улар учун бутловчи қисмларни биргаликда ишлаб чиқариш ҳамда харид қилиш тўғрисидаги баёнотни имзолади. Келишув Россиянинг ҳаводаги провокацияларига қарши НАТОнинг мудофаа салоҳиятини кучайтириш стратегияси доирасида амалга оширилмоқда.
Биргаликда биз ҳаво таҳдидларини йўқ қилиш бўйича бутун дунёдаги энг илғор техник воситалардан айримларига эгамиз. Дронлар дастури ҳар беш давлатдаги мудофаа саноати учун ушбу чақириққа жавоб бериш бўйича сигнал вазифасини бажаради, деди Польша мудофаа вазири Владислав Косиняк-Камиш.
У бу ташаббус Украинанинг Россия ҳаво ҳужумларини қайтариш тажрибасини инобатга олишини таъкидлади.
Сунъий интеллектни дронларга жорий этиш декларациямизда кўрсатилган. Биз алоҳида платформалар ҳақида эмас, балки бутун тизимлар ҳақида гапирмоқдамиз, деди вазир.
Дастурнинг мақсади Европа ҳаво ҳудудининг тез-тез бузилиши ҳолатларига самарали жавоб беришдан иборат. 2025 йилда НАТО ҳаво ҳудудига бузиб кириш билан боғлиқ бир қатор ҳолатлар қайд этилди. Хусусан, Эстония устидан учган Россия қирувчи самолётларидан тортиб, Польша ҳаво ҳудудига кирган ўнлаб дронларгача.
НАТО таҳдидларни бартараф этган бўлса-да, қўмондонлик арзон дронларни йўқ қилиш учун миллионлаб доллар турадиган қирувчиларни ишга солгани учун танқидларга учради.
Муаммо нисбатан арзон ракеталар, дронлар ва олдимизда турган бошқа таҳдидларни самарали уриб туширишда. Биз таҳдидлар қийматини мудофаа қийматига мослаштиришимизга ишонч ҳосил қилишимиз керак, деди Буюк Британия мудофаа вазири ўринбосари Люк Поллард.
