АҚШ Уруш вазири Пит Ҳегсет Ғарбий яримшарда наркотеррористларга қарши “Southern Spear” (Жанубий найза) номли ҳарбий операция бошланганини эълон қилди. Бу ҳақда Ҳегсет ўзининг Х’даги саҳифасида ёзиб қолдирди.
“Бугун мен “Жанубий найза” операцияси бошланганини эълон қиламан. “Жанубий найза” қўшма оператив гуруҳи ва АҚШ Қуролли кучларининг Жанубий қўмондонлиги бошчилигида бу миссия юртимизни ҳимоя қилади, наркотеррористларни бизнинг яримшаримиздан чиқариб юборади ва халқимизни ўлдираётган наркотиклардан мамлакат хавфсизлигини таъминлайди. Ғарбий яримшар – бу Америка ҳудуди ва биз уни ҳимоя қиламиз”, дея ёзган Уруш вазири.
Бундан аввал АҚШнинг энг йирик авиация кемаси USS Gerald R. Ford Жанубий қўмондонлик зонаси – Лотин Америкаси ва Кариб денгизи ҳудудига кирган эди. У минтақада жойлашган АҚШ Ҳарбий-денгиз кучларининг яна саккизта кемасига қўшилди. Кеманинг бортида 4 мингдан ортиқ ҳарбий хизматчи бор, шунингдек, у ўнлаб жанговар қирувчилар, зарба берувчи самолётлар ва ҳарбий вертолётларни олиб юради.
ОАВнинг ёзишича, Gerald R. Ford бир неча кун ичида Венесуэла қирғоқларига етиб боради. У бу ерда бошқа ҳарбий кемалар, атом сувости кемаси ва Пуэрто-Рикода жойлашган ҳарбий самолётлар билан бирга, сўнгги ўн йилликлардаги АҚШнинг минтақадаги энг йирик ҳарбий мавжудлигини шакллантиради.
CBS News нашрининг хабар беришича, кеча, 13 ноябрь куни юқори мартабали ҳарбий амалдорлар АҚШ Президенти Дональд Трампга Венесуэлада амалга оширилиши мумкин бўлган ҳарбий операцияларнинг янгиланган вариантларини тақдим этган. Пит Ҳегсет, Қўшма штаб бошлиқлари қўмитаси раҳбари генерал Дэн Кейн ва бошқа расмийлар Трампга яқин кунларга мўлжалланган ҳарбий режалар ҳақида ахборот берган.
Қолаверса, олдинроқ “Financial Times” АҚШнинг Венесуэлага ҳужум қилишининг учта сценарийсини келтирганди:
наркотрафикка алоқадор объектларга ракета ва дрон зарбалари;
Венесуэла Президенти Николас Мадуро ёки унинг энг яқин одамларини қўлга олиш амалиёти;
тўлиқ миқёсли босқин (бироқ унинг эҳтимоли паст деб баҳоланган).
АҚШ Қуролли кучлари сентябрдан буён Венесуэладаги денгиз нишонларига зарбалар бериб келмоқда. Американинг расмий баёнотига кўра, бу ҳаракатлар наркотрафикка қарши кураш доирасида амалга оширилмоқда.
Октябрь ойида Венесуэла БМТ Хавфсизлик кенгашидан АҚШ билан юзага келган вазиятга аралашишни сўраган эди. Ўша пайтда Россиянинг БМТдаги доимий вакили Василий Небензя АҚШ “рангли инқилоблар воситаларидан фойдаланиб, мамлакатда ўзига ёқмайдиган режимни алмаштирмоқчи бўлаётгани”ни тахмин қилган.
