АҚШ ҳарбийлари Президент Дональд Трамп Эронга зарба бериш ҳақида буйруқ чиқарган тақдирда, бир неча ҳафта давом этиши мумкин бўлган кенг кўламли операцияга тайёргарлик кўрмоқда. Бу ҳақда икки нафар америкалик расмийга таяниб, “Reuters” хабар берди.
Уларнинг айтишича, эҳтимолий ҳарбий миссия аввалги чекланган зарбалардан анча жиддийроқ тус олиши мумкин.
Маълумотларга кўра, Пентагон Яқин Шарққа қўшимча авиация ташувчиси, минглаб ҳарбий хизматчилар, қирувчи самолётлар ва бошқариладиган ракета қурилмаларини юбормоқда. Ўтган ҳафта АҚШ ва Эрон дипломатлари Уммон орқали музокаралар ўтказган бўлса-да, Трамп Шимолий Каролинадаги ҳарбий база олдида сўзга чиқиб, Теҳрон билан келишувга эришиш қийин кечаётганини айтган ва зарурат туғилса куч ишлатилишини истисно этмаган.
Оқ уй матбуот котиби ўринбосари Анна Келли Президент Ислом Республикаси бўйича “барча вариантларни кўриб чиқаётганини” билдирган. Пентагон эса оператив режаларга изоҳ беришдан бош тортган. Расмийларнинг таъкидлашича, эҳтимолий узоқ муддатли кампания фақат ядровий объектларгина эмас, балки Эроннинг давлат ва хавфсизлик инфратузилмасини ҳам нишонга олиши мумкин.
Мутахассислар бундай сценарий АҚШ кучлари учун юқори хавф туғдиришини қайд этмоқда. Эроннинг ракета арсенали салмоқли бўлиб, жавоб зарбалари минтақавий можарони кенгайтириши эҳтимоли мавжуд. Эрон Ислом инқилоби қўриқчилари корпуси зарба берилган тақдирда, минтақадаги Вашингтон базаларига ҳужум қилиш билан таҳдид қилган.
Маълумки, Қўшма Штатларнинг Иордания, Қувайт, Саудия Арабистони, Қатар, Баҳрайн, БАА ва Туркияда ҳарбий объектлари мавжуд.
Шу фонда Исроил Бош вазири Биньямин Нетаньяху Вашингтонда Трамп билан учрашиб, Эрон билан эҳтимолий келишув Исроил хавфсизлик манфаатларини ҳам қамраб олиши лозимлигини таъкидлаган. Теҳрон эса санкциялар бекор қилиниши эвазига ядровий дастур бўйича чекловларни муҳокама қилишга тайёрлигини, бироқ ракета дастурини музокараларга боғламаслигини билдирган.
