Қирғизистонда аёл фолбин тавсияси билан 43 минг долларни қабристонга кўмди. Фолбин бизнесга “йўл очиб бериш” ваъдаси билан шундай маслаҳат берган. Бу ҳақда Caravan Info хабар берди.
Жабрланувчининг сўзларига кўра, у май ойидан октябрь ойигача бир қабрга бир неча бор келиб, пулларни ўша ерга кўмиб кетган. Бир сафар 10 минг, кейинги сафар эса 15 минг долларни ўз қўллари билан қабр тупроқлари орасига яширган. Фирибгар аёл бу пуллар “сеҳрли тарзда ғойиб бўлади” ва молиявий муваффақият олиб келади, деб ишонтирган. У қабрга фақат доллар кўмишни буюрган. Учинчи мартадан сўнг аёл алданганини тушуниб, полицияга мурожаат қилган.
Гумонланувчи 25 ёшда бўлиб, Бишкек шаҳрининг Первомайск тумани Ички ишлар бўлими ходимлари томонидан қўлга олинган. У бошқаларга ўзини табиб сифатида таништириб, “маросимлар” чоғида қабристонларда пул қолдиришни сўраган, шунингдек ип, игна ва бошқа “сеҳрли буюмлар”дан фойдаланган. Ҳолат юзасидан Қирғизистон Жиноят кодексининг 209-моддаси (фирибгарлик) билан жиноят иши қўзғатилган. Ҳозирда гумонланувчи изоляторда сақланмоқда.
