АҚШ Тайванга қурол сотишни давом эттирса, Хитой Дональд Трампнинг апрелда Пекинга режалаштирилган ташрифи бекор қилиниши мумкинлиги ҳақида огоҳлантирди. Бу ҳақда Financial Times (FТ) хабар берди.
Маълумотларга кўра, Пекин ташрифни бекор қилиш таҳдидини босим ўтказиш воситаси сифатида қўллаши мумкин, бироқ охир-оқибат бундай қадам босмайди. Шу билан бирга, айрим экспертлар Оқ уй Трамп Хитойдан қайтгунига қадар қурол-яроғ бўйича янги битимларни кечиктиришга мажбур бўлиши мумкинлигини тахмин қилмоқда.
Financial Times манбаларининг таъкидлашича, Трамп маъмурияти декабрь ойида эълон қилинган 11,1 миллиард долларлик рекорд қийматдаги битимга қўшимча равишда Тайван учун яна қурол-яроғ пакетини тайёрламоқда. Хусусан, Патриот ракеталари, қўшимча NASAMS ҳаво мудофаа тизимлари ва бошқа турдаги қуроллар кўзда тутилмоқда. Бўлажак битимнинг умумий қиймати 20 миллиард долларгача баҳоланмоқда.
Хитой Халқ Республикаси раиси Си Цзиньпин яқинда Трамп билан телефон орқали суҳбатда бу масалани кўтариб, АҚШ Тайванга қурол етказиб бериш масаласида “эҳтиёткорлик билан иш тутиши” кераклигини таъкидлаган.
Тайван масаласи 1949-йилда Хитой Халқ Республикаси эълон қилингани ва Тайван ороли Гоминдан партияси назорати ҳамда Хитой Республикаси бошқаруви остида қолгани туфайли юзага келган. Пекин “ягона Хитой тамойили”ни қатъий ҳимоя қилмоқда. Унга кўра бир вақтнинг ўзида ХХР ва Тайвандаги Хитой Республикасини тан олиш мумкин эмас.
