АҚШ Аэронавтика ва космик тадқиқотлар миллий бошқармаси (НАСА)нинг келгуси Ой ва орбитал миссиялари экипажлари агентлик тарихида биринчи марта парвозларни ҳужжатлаштириш учун iPhone смартфонларидан фойдаланишади. Бу ҳақда Bloomberg агентлиги хабар берди.
More stories“Биз экипажларимизга оилалари учун муҳим лаҳзаларни муҳрлаш ҳамда бутун дунёга илҳомлантирувчи расмлар ва видеоларни улашиш имконини берувчи воситаларни тақдим этамиз. Биз кўп йиллик жараёнларни ўзгартириб, қисқа вақт ичида космик парвозлар учун замонавий ускуналарни тайёрладик”, дейди НАСА раҳбари Жаред Айзекман.
НАСА вакиллари келажакда бошқа қурилмалар ҳам сертификатланиши мумкинлигини таъкидлашган, аммо ҳозирча танлов iPhone’нинг сўнгги моделлари фойдасига ҳал қилинган. Бунга қадар космонавтлар парвозларда смартфонлар ўрнига сертификатланган ноутбуклар, фото ва видеокамералардан фойдаланишган. Суратга олиш учун Nikon DSLR ва GoPro камералари қўлланган.
Космосда оммавий тижорат маҳсулотларидан фойдаланиш НАСА учун ноодатий ҳолат бўлиб, одатда ускуналарни узоқ вақт синовдан ўтказишни талаб қилади. Bloomberg нашрининг ёзишича, бу қарор АҚШ президенти Дональд Трамп маъмуриятининг бюрократияни камайтириш ва НАСА фаолиятини тезлаштириш учун хусусий сектор технологияларини фаол жорий этишга қаратилган янги йўналишини акс эттиради.
Агентлик ҳисоб-китобларига кўра, бу миссия тарихдаги энг батафсил ҳужжатлаштирилган миссиялардан бирига айланади.
“Астронавтлар вазнсизлик шароитида TikTok юлдузларига айланишлари ёки космик кемада ўта кенг бурчакли объективда селфи олишлари қанчалик ажойиб (ёки ғалати) бўлишини тасаввур қилинг”, деб ёзган TechCrunch нашри.
