Хитой маҳсулотларининг Германияга импорти январь–сентябрь ойларида кескин ошди. Немис экспертлари Хитой компанияларини дампингда айблаб, Европа Иттифоқидан тарифлар жорий этишни талаб қилмоқда. Бу ҳақда “Deutsche Welle” хабар берди.
Федерал статистика бошқармаси (Висбаден) маълумотига кўра, жорий йилнинг январь–сентябрь ойларида Германиянинг Хитойдан импорти 8,5 фоизга ошиб, 124,5 миллиард еврога етган.
Натижада Хитой АҚШни ортда қолдириб, яна Германиянинг энг йирик савдо шеригига айланган. Икки давлат ўртасидаги умумий савдо ҳажми — импорт ва экспортни қўшганда — 185,9 миллиард еврони ташкил этди.
Шу билан бирга, Германиянинг Хитойга экспорти 12,3 фоизга камайиб, 61,4 миллиард еврога тушди.
2016 йилдан 2023 йилгача Хитой Германиянинг бош савдо шериги бўлиб келган. 2024 йилда бу ўринни АҚШ эгаллаган эди. Аммо жорий йил бошидан АҚШ Президенти Дональд Трампнинг тариф сиёсати туфайли Германиянинг Қўшма Штатларга экспорти қисқариб, умумий савдо ҳажми пасайди.
Кёлндаги Германия Иқтисодиёт институти экспертларига кўра, АҚШ билан савдо уруши оқибатида Хитой экспортининг бир қисми Германия бозорига йўналтирилмоқда. Шу билан бирга, Германияда Хитой маҳсулотлари нархи 2025 йилнинг биринчи ярмида ўтган йилга нисбатан 4 фоизга арзонлашган. Хитой етказиб берувчилари Германия бозорига дампинг нархларида киришга уринмоқда.
Институт эксперти Юрген Метйс Брюсселни “адолатли рақобатни тиклаш учун” компенсация божларини фаолроқ жорий этишга чақирди.
Тадқиқотга кўра, айниқса Германия автомобилсозлик саноати Хитойдан келаётган арзон импортдан жиддий зарар кўрмоқда. 2025 йилнинг биринчи ярмида Хитойдан Германияга гибрид автомобиллар импорти 130 фоиздан ошган.
