Ўзбекистон космик технологиялар соҳасида АҚШнинг хусусий аэрокосмик компанияси — Vast билан ҳамкорликни йўлга қўйди. Бу ҳақда Рақамли технологиялар вазирлиги хабар берди.
Маълум қилинишича, вазир Шерзод Шерматов АҚШга ташрифи доирасида дунёдаги илк тижорий космик станцияни қуриш билан шуғулланаётган Америка хусусий аэрокосмик компанияси — Vast компаниясининг вице-президенти Рич Лешнер билан учрашув ўтказди. Учрашувда Ўзбекистонда космик технологияларни ривожлантириш, халқаро ҳамкорликни мустаҳкамлаш ҳамда мамлакатнинг космик соҳадаги инсон салоҳиятини кенгайтириш масалалари муҳокама қилинди.
Шерзод Шерматов фан ва инновацияларни қўллаб-қувватлаш, ёш тадқиқотчилар учун имкониятлар яратиш ҳамда Ўзбекистоннинг халқаро космик дастурларда фаол иштирокини таъминлаш муҳимлигини таъкидлади.
Томонлар Vast компанияси билан узоқ муддатли ҳамкорлик истиқболларини муҳокама қилиб, қўшма илмий тадқиқотлар, кадрлар алмашинуви дастурлари ва ўзбекистонлик мутахассисларни Haven-1 орбитал станциясининг муваффақиятли учирилишидан сўнг келгуси миссияларда иштирок эттириш масалаларини кўриб чиқди.
Шунингдек, Haven-2 лойиҳаси доирасида сунъий гравитация, ҳаётни қўллаб-қувватлаш тизимлари ва орбитал архитектура бўйича тадқиқотларда ўзбекистонлик олим ва муҳандисларнинг иштирок этиши эҳтимоли муҳокама қилинди.
Таълим, кадрлар тайёрлаш, амалиёт ва қўшма лабораториялар яратиш соҳаларида қўшимча ташаббуслар илгари сурилди. Хабарда таъкидланишича, бу Ўзбекистон ва Vast ўртасидаги амалий ҳамкорликни янада кенгайтиришга қаратилган.
Учрашув якунида томонлар ўзаро ҳамкорликни мустаҳкамлаш ва ўзбекистонлик мутахассисларнинг халқаро космик дастурлар ҳамда орбитал технологиялар лойиҳаларида иштирокини ошириш бўйича келгуси қадамларни белгилаб берувчи ўзаро англашув меморандумини имзолади.
Vast — АҚШда жойлашган хусусий аэрокосмик компания бўлиб, янги авлод космик станцияларини ишлаб чиқиш билан шуғулланади. Компаниянинг илк лойиҳаси — Haven-1, дунёдаги илк тижорий космик станция бўлиб, келгусида кўп модулли стансиялар, жумладан Haven-2 учун асос бўлиб хизмат қилади.
