Senford Bernem Prebis тиббий тадқиқотлар институти олимлари саратон ҳужайраларининг организм иммун тизимидан ҳимояланиш механизмини аниқлади. Бу ҳақда Science Адванcес журналида чоп этилган тадқиқот ишига таяниб “Science mail.ru” нашри хабар берди.
Олимларнинг аниқлашича, саратон ҳужайралари атрофдаги иммун ҳужайралари, томирлар ва тўқималарни ўзгартириш орқали ўзини ниқоблайди. Кузатувлар давомида глюкоза миқдорининг ортиши ўсма муҳитида ҳужайралар атрофида шакар молекулаларидан иборат махсус қатлам — гликокаликснинг қалинлашишига олиб келиши маълум бўлди. Ушбу қалин қобиқ саратон ҳужайраларини иммун тизими ҳужумларидан яширади.
Тажрибалар натижасида бу жараёнда HSF1 деб номланувчи оқсил асосий ролни ўйнаши исботланди. Мазкур оқсил асосан ҳужайраларни юқори ҳароратдан ҳимоя қилади, бироқ айни пайтда кўкрак саратонининг ривожланиши ва бошқа аъзоларга тарқалишига — метастаз ҳам сабаб бўлади.
Тадқиқот муаллифларининг таъкидлашича, қонда шакар миқдорининг ортиши фақатгина HSF1 оқсили мавжуд бўлган муҳитда саратон ҳужайраларининг ниқобланиш хусусиятини кучайтиради.
Ушбу кашфиёт келгусида саратон ҳужайралари юзасидаги ҳимоя қобиғини юпқалаштирадиган ва иммун тизимига ўсмани осонроқ йўқ қилишга ёрдам берадиган янги турдаги дори воситаларини яратишга замин ҳозирлайди.
