2025 йил январь—декабрь ойларида Ўзбекистон ялпи ички маҳсулоти 1 квадриллион 849 триллион сўмдан ошди. Мамлакат иқтисодиёти 2024-йилга нисбатан 7,7 фоизга ўсди, дея маълум қилди Статистика қўмитаси.
Ўтган йили АҚШ долларининг ўртача тортилган курси 12 577,35 сўм бўлгани ҳисобга олинса, мамлакат ялпи ички маҳсулоти 147 миллиард доллардан ортган.
Йил давомида республикада саноат маҳсулотлари ишлаб чиқариш ҳажми 6,8 фоизга ўсиб, 1,1 квдриллион сўмдан ошган. Қишлоқ, ўрмон ва балиқчилик хўжалиги маҳсулот ва хизматлари ҳажми 4,4 фоизга кўпайиб, 538,9 триллион сўмга етган. Қурилишлар ҳам 14,2 фоизга кўпроқ бажарилиб, умумий кўрсаткич 313,9 триллион сўмни ташкил этган. Хизматлар кўрсатиш соҳасидаги ўсиш суръати 8,5 фоиз бўлган.
Республикада 2025 йилда инфляция даражаси 7,3 фоизни ташкил этган. Бунда озиқ-овқат маҳсулотлари нархлари ўртача 5,4 фоизга, ноозиқ-овқат маҳсулотлар 5,1 фоизга қимматлашган. Хизматлар нархи ўсиш суръати 13,9 фоизга етган.
Ўтган йили асосий капиталга инвестициялар ҳажми 591,1 триллион сўмни ташкил этган (йиллик ўсиш 10,5 фоиз). Бунда тўғридан-тўғри хорижий инвестициялар улуши 40,5 фоизга етган. Корхоналар ҳисобидан ўзлаштирилган сармоялар 15,3 фоиз, давлат кафолати остидаги хорижий кредитлар ҳиссаси 5,5 фоиз бўлган.
Йил мобайнида мамлакат ташқи савдо айланмаси тарихда илк бор 81,1 миллиард доллардан ошган (йиллик ўсиш 20,7 фоиз). Хусусан, экспорт ҳажми 33,8 миллиард доллар (йиллик ўсиш 24 фоиз), импорт кўрсаткичи 47,3 миллиард долларга (ўсиш 18,5 фоиз) етган.
