Саудия Арабистонида 2025-йилда рекорд даражада 340 киши қатл этилди. Бу ҳақда AFP агентлигининг 15 декабрь кунги ҳисоб-китобига таяниб, The Times of Israel хабар берди.
Инсон ҳуқуқлари ташкилотлари 1990 йиллардан бошлаб Саудияда қатллар сонини ҳужжатлаштириб келади. AFP маълумотларига кўра, 2024 йилда қиролликда 338 киши қатл этилган эди.
Қатлларнинг аксари наркотик билан боғлиқ
Маълум қилинишича, сўнгги марта Макка вилоятида қотиллик учун уч нафар шахс қатл этилган. Мамлакат Ички ишлар вазирлигига асосланган AFP ҳисоб-китобларига кўра, 2025 йил бошидан буён Саудия Арабистонида гиёҳванд моддалар билан боғлиқ ишлар бўйича 232 киши ўлимга ҳукм қилинган.
Таҳлилчилар қатллар сонининг кескин ўсишини қиролликнинг 2023 йилда бошланган “наркотикларга қарши уруш”ига боғламоқда. Дастлаб ҳибсга олинган кўплаб шахслар эндиликда суд жараёнлари ва ҳукмларидан сўнг қатл этилмоқда. Саудия Арабистонида уч йил давомида наркотик ишлари бўйича ўлим жазоси чекланган эди. Аммо 2022 йил охирига келиб, бу турдаги қатллар қайта тиклаган.
Каптагон савдосига қарши кураш
БМТ маълумотларига кўра, Араб дунёсидаги энг йирик иқтисодиётга эга бўлган Саудия Арабистони каптагон таблеткалари учун ҳам энг йирик бозорлардан бири ҳисобланади. Каптагон (фенетиллин) амфетамин туридаги синтетик стимулятордир.
Наркотикларга қарши кураш бошланганидан буён мамлакат магистрал йўллар ва чегара ўтиш жойларида полиция назорат-ўтказиш пунктлари сонини оширгам. Бу жойларда миллионлаб таблеткалар мусодара қилиниб, ўнлаб гиёҳванд моддалар савдогарлари ҳибсга олинган.
