Мексикада президент Клаудия Шейнбаумнинг сиёсатига қарши намойишлар авж олди. Мехико шаҳри бўйлаб ўтказилган маршларда камида 120 киши, асосан полиция ходимлари жароҳатланди. Бу ҳақда The Guardian хабар берди.
Намойишлар 15 ноябрь куни бўлиб ўтган ва “Z авлод” вакиллари томонидан уюштирилган. Бироқ мухолифат партияларининг катта ёшли тарафдорлари ҳам уларга қўшилган.
“Бу сафарбарлик бир неча соат давомида тинч йўл билан давом этди ва ривожланди, аммо кейинчалик ниқоб таққан бир гуруҳ шахслар зўравонлик ҳаракатларини содир эта бошлади”, деди Мехико шаҳри хавфсизлик хизмати бошлиғи Пабло Васкес.
У 100 нафар полициячи жароҳатлангани, улардан 40 нафари кўкариш ва кесилган жароҳатлар сабаб шифохонага ётқизилганини айтди. 20 нафар норозилик билдирувчи фуқаролар ҳам жароҳат олган.
Шейнбаум 2024 йил октябрь ойидан бери ҳокимиятда, унинг сиёсатини маъқуллаш рейтинги 70 фоиздан ошади. Бироқ бир нечта шов-шувли қотилликлар туфайли президентнинг хавфсизлик сиёсати танқидга учради.
Намойишлар ҳам Уруапан шаҳри мэри Карлос Мансо отиб ўлдирилгани ортидан бошланди, марҳум наркокартелларга қарши кураши билан танилганди. Намойишчиларнинг кўпчилиги қўлларида баннерлар кўтарган ва шаҳар мэри хотирасига бош кийимлар кийган.
“У (ўлдирилган мэр) жиноятчиларга қарши курашиш учун тоғларга офицерларни юборди, шу сабабли уни ўлдиришди”, деди 65 ёшли кўчмас мулк агенти Роса Мария Авила.
“Бизга кўпроқ хавфсизлик керак”, деди 29 ёшли бизнес маслаҳатчиси Андрес Масса. У намойишларга “Z авлод” норозилик акцияларининг глобал рамзига айланган “қароқчи бош суяги” байроғини кўтарган ҳолда келган.
Намойишчилар Шейнбаум яшайдиган ва ишлайдиган Миллий сарой олдида тўпланиб, бино атрофидаги металл тўсиқларнинг бир қисмини қулатган. Мажмуа ҳудудини қўриқлаётган полиция панжараларни ураётган намойишчиларни ушлаб туриш учун кўздан ёш оқизувчи газлардан фойдаланган.
“Карлос Мансони (марҳум мэр) шундай ҳимоя қилишингиз керак эди”, дея бақирган намойишчиларнинг баъзилари хавфсизлик кучларига.
