Болгарияда 11 декабрь куни бош вазир Росен Желязков бошчилигидаги ҳукумат истеъфо берди. Бу ҳақда AP News хабар берди.
Мазкур воқеа Европа Иттифоқи аъзоси бўлган мамлакатнинг еврозонага қўшилиши арафасида содир бўлди. Маълум қилинишича, ҳукумат тарқатиб юборилишига мамлакатда 10 декабрь куни содир бўлган оммавий намойиш туртки бўлган. GERB партияси бошчилигидаги озчилик коалициясининг истеъфоси парламентда мухолифат томонидан илгари сурилган ҳукуматга нисбатан ишончсизлик вотуми овозга қўйилиши олдидан эълон қилинди.
“Бугун ўтказилиши керак бўлган ишончсизлик вотумидан олдин ҳукумат истеъфога чиқмоқда”, деди Росен Желязков.
Норозиликлар миқёси ва сабаблари
Чоршанба, 10 декабрь куни бўлиб ўтган намойишлар ўтган ҳафтадаги протестларнинг давоми бўлди. Аҳоли мамлакатда коррупция авж олган олганидан шикоят қилган. Шунингдек, улар яхшироқ турмуш ва меҳнат шароитларини талаб қилган. Оммавий ахборот воситаларининг дрон тасвирларига асосланган ҳисоб-китобларига кўра, биргина пойтахт Софиянинг ўзида намойишчилар сони 100 мингдан ошган, баъзи маълумотларга кўра эса 150 минггача етган.
“Миллий Ассамблеянинг қарорлари халқ иродасини акс эттирсагина мазмунли бўлади. Биз жамият истагини инобатга оламиз”, деди Желязков намойишларга ишора қилиб.
Кейинги сиёсий қадамлар
Ҳукуматнинг истеъфоси расман 12 декабрь куни парламентга тақдим этилади ва у қабул қилингандан сўнг янги сиёсий жараён бошланади. Президент Румен Радев парламентдаги энг катта гуруҳга янги ҳукуматни тузиш имкониятини беради.
6,4 миллион аҳолига эга Болгария 2007-йилда ЕИга аъзо бўлган. Мамлакат 21-аъзо сифатида 1 январь куни ўзининг миллий валютаси левдан еврога ўтишни режалаштирилган. Ҳукумат инқирози бу жараёнга қандай таъсир кўрсатиши ҳозирча аниқ эмас.
