Афғонистоннинг “Толибон” ҳукумати 10 декабрь куни расмий диний қарорлар тўпламини эълон қилди. Унга кўра афғонларнинг мамлакат ташқарисидаги жангларда иштирок этиши тақиқланди. Бу ҳақда манбаларга таяниб, Al Arabiya хабар берди.
Маълум қилинишича, ҳукуматга хориждаги жанг майдонларига чиқишга уринган ҳар қандай шахсни жазолаш учун кенг ваколатлар берилган. Бу қарорлар Кобулда бош вазир Мулла Ҳасан Охунд ва бош судья Абдул Ҳаким Шараъий иштирокида бўлиб ўтган йирик диний уламолар йиғилишида қабул қилинган.
Уламолар йиғинининг асосий қарорлари
Al Arabiya’га маълумот берган манбаларнинг таъкидлашича, йиғилишда Афғонистоннинг турли бурчакларидан 1000 га яқин уламо иштирок этган. Улар олий раҳбар Мулла Ҳайбатуллоҳ Охундзоданинг бевосита буйруғи билан тўпланган ва минтақавий кескинлик фонида ҳукуматга кенг ваколатлар берган.
Al Arabiya қўлга киритган расмий ҳужжат бешта асосий резолюцияни ўз ичига олади:
1. Ҳеч бир афғоннинг ҳарбий ёки жанговар фаолият учун бошқа мамлакатларга саёҳат қилишига рухсат берилмайди.
2. Қоидани бузиш гуноҳ, деб ҳисобланиб, ҳукуматга қонунбузарларга нисбатан чоралар кўриш учун тўлиқ ваколат берилади.
3. Афғонистон ҳудуди бошқа давлатларга қарши ишлатилмайди. Уламолар бу қоида нафақат афғонларга, балки Афғонистон заминида бўлган ҳар қандай шахсга ҳам тегишли эканини билдирди.
4. Афғонистонни ҳар қандай ҳужумдан ҳимоя қилиш бурчи алоҳида таъкидланди.
5. Диний уламоларнинг миллий масалалар бўйича кўрсатмалар беришдаги роли давом этади.
Покистан билан зиддиятлар фонида
Йиғилиш Афғонистон ва Пакистан ўртасида чегара кескинлиги авж олган бир пайтда бўлиб ўтган. Покистан “Толибон”ни мамлакат ҳудудини ТТП (Таҳрики Толибон Покистан) жангариларига ҳужумларни режалаштириш учун беришда айбламоқда. Афғонистон томони эса бу даъволарни рад этиб келади.
“Толибон”нинг юқори мартабали амалдори (исми сир қолиш шарти билан) бу қарорларнинг Покистан билан зиддиятга алоқаси йўқлигини айтган. У буни “уламоларнинг келишуви” деб таърифлаб, бу ҳаракат “Толибон”нинг минтақадаги давлатларга қарши афғон заминидан фойдаланмаслик мажбуриятини кўрсатишини таъкидлаган.
