АҚШ Президенти Дональд Трамп Конгрессидан “Алькатрас” қамоқхонасини қайта тиклаш учун 152 миллион доллар ажратишни сўради. Оқ уй томонидан эълон қилинган 2027 йилги бюджет лойиҳасида ана шундай маълумотлар келтирилган. Бу ҳақда CNN хабар берди.
Ҳозирда “Алькатрас” машҳур туристик маскан ҳисобланади. Оқ уй раҳбари “Алькатрас”ни хавфли жиноятчилар учун яна қаттиқ тартибли қамоқхонага айлантирмоқчи. Оммавий ахборот воситаларининг ёзишича, собиқ қамоқхона жойлашган оролда канализация ва сув қувурлари мавжуд эмас.
“Қоя” (The Rock) номи билан танилган оролнинг катта қисми қуш ахлати билан қопланган. Барча зарур анжомларни қайиқларда етказиб беришга тўғри келади”, дейилади хабарда.
Сан-Франциско расмийлари Трампнинг қамоқхонани қайта тиклаш ниятини ижобий баҳоламаган, чунки туризм шаҳар иқтисодиётининг энг йирик тармоқларидан бирига айланган. Бир йил олдин ҳам Дональд Трамп машҳур “Алькатрас” қамоқхонаси фаолиятини қайта тиклаш ниятида эканлигини маълум қилган эди.
Маълумот учун, “Алькатрас” қамоқхонаси 1963 йилда бош прокурор Роберт Кеннедининг қарори билан ёпилган. Бунга асосий сабаб уни сақлаш харажатларининг юқорилиги бўлган – бир маҳбус учун кунига қарийб 10 доллар сарфланган, бошқа қамоқхоналарда эса бу кўрсаткич 3 долларни ташкил этган. Охирги 30 нафар маҳбус бошқа муассасаларга ўтказилган. Бир вақтлар бу қамоқхонада афсонавий гангстер Аль Капоне сақланган.
Бугунги кунда “Алькатрас” жамоат музейи ва Сан-Францисконинг асосий диққатга сазовор жойларидан бири бўлиб, ҳар йили тахминан 1,5 миллионга яқин туристни жалб қилади. Собиқ қамоқхона АҚШ Миллий боғлар хизмати тасарруфида бўлиб, у ерда тиклаш ва таъмирлаш ишлари олиб борилади.
