Фарғона вилояти Риштон туманида вояга етмаган ўқувчи қизга шилқимлик қилган ўқитувчи 5 суткага қамалди.
Маълум бўлишича, 1999 йилда туғилган мактаб ўқитувчиси Д.И. 2026 йилнинг 1 апрель куни соат 22:33 ларда Telegram орқали вояга етмаган Д.га ёзишмалар орқали унга номақбул бўлган, шаъни ва қадр-қимматини таҳқирлайдиган сўзлар билан шилқимлик қилган.
Судда айбланувчи ўқувчи қиз билан аввалдан ёзишиб юрганини, ундан қутилиш мақсадида шундай фикрлар ёзганини билдириб, қилмишидан пушаймонлигини айтган ҳамда енгиллик сўраган.
Жиноят ишлари бўйича Риштон туман суди Д.И.ни Маъмурий жавобгарлик тўғрисидаги кодексининг 41¹-моддаси 1-қисми билан айбли деб топган ҳам унга нисбатан 5 сутка маъмурий қамоқ жазоси тайинланган.
Аввалроқ Самарқандда “районо” ходими мактаб ўқитувчисига шилқимлик қилгани учун 5 суткага қамалгани хабар қилинганди. Тошкент вилояти Юқори Чирчиқ туманида вояга етмаган ўқувчига шилқимлик қилган мактаб директори 5 суткага қамалганди. Бундан ташқари Навоий вилояти Конимех туманида вояга етмаган ўқувчи қизни автомашина бошқаришга жалб қилган ҳамда унга шилқимлик қилган 58 ёшли эркакка 5 сутка берилганди.
Шаҳвоний шилқимлик қилганлик учун жазо
Маъмурий жавобгарлик тўғрисидаги кодекснинг 41-1-моддасига кўра, шаҳвоний шилқимлик қилиш, яъни шахсга нисбатан унинг учун номақбул бўлган ҳамда унинг шаъни ва қадр-қимматини таҳқирлайдиган, шахснинг ташқи қиёфасини ёки қадди-қоматини тавсифлашда, имо-ишора қилишда, тегинишда, чақиришда ифодаланган, шаҳвоний хусусиятга эга бўлган ҳаракатларни бир марта қўпол равишда ёки бир неча марта содир этганлик учун базавий ҳисоблаш миқдорининг икки бараваридан беш бараваригача миқдорда жарима солишга ёки беш суткагача муддатга маъмурий қамоққа олишга сабаб бўлади. Худди шундай ҳуқуқбузарликлар маъмурий жазо чораси қўлланганидан кейин бир йил давомида такрор содир этилган бўлса, базавий ҳисоблаш миқдорининг беш бараваридан етти бараваригача миқдорда жарима солишга ёки ўн беш суткагача муддатга маъмурий қамоққа олишга сабаб бўлади.
