Хотин-қизларни қўллаб-қувватлашга оид қўшимча чора-тадбирлар тўғрисидаги президент фармони қабул қилинди. Бу ҳақда Адлия вазирлиги хабар қилди.
Қайд этилишича, унинг асосий мақсадлари этиб маҳаллаларда хотин-қизларнинг бандлигини таъминлаш ва саломатлигини мустаҳкамлаш марказлари фаолиятини кенгайтириш ҳамда 2026–2027-йилларда “ҲАМРОҲ” хотин-қизлар тадбиркорлигини қўллаб-қувватлаш компанияси томонидан қуйидагиларни амалга ошириш белгиланган:
- 6 минг нафар хотин-қизларнинг тадбиркорлик лойиҳаларини молиявий қўллаб-қувватлаш учун 2 триллион сўм йўналтириш;
- 2,8 минг нафар хотин-қизларни тадбиркорликка ўқитиш;
- 2 минг нафар хотин-қизларнинг тадбиркорлик фаолиятига ҳамроҳлик қилиш асосида кўмаклашиш.
Шу билан бирга, туман ва шаҳар ҳокимликлари томонидан ташкил этилган айрим марказлар тегишли ташкилотлар томонидан тикувчилик, қандолатчилик, фитнес, шейпинг, хотин-қизларни касбга ўқитиш каби фаолиятларни ташкил этиш учун ижарага берилади.
