Варшавада трамвай бошқариш маҳорати бўйича XII Европа чемпионати — Tram-EM бўлиб ўтди. Мусобақада Европанинг турли шаҳарларидан ҳамда Австралиянинг Мелбурн шаҳридан келган 26 та жамоа иштирок этди.
Чемпионат Варшавадаги Маршалковская кўчасида, Маданият ва фан саройи яқинида ташкил этилди. Ушбу тадбир Жамоат транспорти куни муносабати билан ўтказилиб, Польша пойтахтидаги трамвай тармоғининг 160 йиллигига бағишланди.
Ҳайдовчилар кўп тонналик трамвайларни бошқаришда аниқлик, тезлик ҳамда тормозлаш маҳорати бўйича беллашди. Ҳар бир жамоа икки кишидан — бир аёл ва бир эркак ҳайдовчидан ташкил топди.
Энг қизиқарли шартлардан бири “трамвай боулинги” бўлди: унда ҳайдовчилар трамвай билан катта коптокни юмалатиб олдинга қўйилган улкан кеглларни уриб йиқитди.
Бундан ташқари, трамвайларга сув тўлдирилган идишлар қўйилиб, ҳайдовчилар уларни қанчалик равон бошқариши текширилди. Яна бир шартда эса спидометр ёпиб қўйилди ва ҳайдовчилар тезликни унга қарамасдан назорат қилиши керак бўлди.
Мусобақада Прага жамоаси ғолиб бўлди.
