Қирғизистон президенти Садир Жапаров 14 сентябрь куни ўзбекистонлик ёзувчи ва журналист Аҳмаджон Мелибоевни “Дўстлик” ордени билан мукофотлади.
Қирғизистон президенти матбуот хизматининг берган хабарига кўра, давлат мукофотларини топшириш маросими “Интимак Ордо” қароргоҳида бўлиб ўтган.
Аҳмаджон Мелибоев Ўзбекистон маданият соҳаси вакили, ёзувчи ва журналист сифатида “Дўстлик” ордени билан тақдирланди.
Маросимда касбий фаолиятида катта натижаларга эришган, мамлакатнинг ижтимоий-иқтисодий, интеллектуал ва маданий ривожига ҳисса қўшган турли соҳа вакилларига давлат мукофотлари топширилди.
“Давлат мукофоти — ўз меҳнати билан мамлакат тараққиёти ва халққа хизмат қилишга салмоқли ҳисса қўшган инсонларга давлат томонидан билдириладиган эътироф ва миннатдорликнинг энг олий шаклидир”, деди Садир Жапаров.
Қирғизистон президенти мукофотлаш тизимини тартибга солиш, адолат, холислик ва шаффофликни таъминлаш мақсадида тегишли қонун ишлаб чиқилиб, қабул қилинганини қайд этди.
“Биз мукофотлаш тизимини қонунчилик даражасида янгилаш, шунингдек, давлат мукофотлари нуфузини ошириш бўйича қадамлар ташладик. Янги қонунчиликка мувофиқ, мукофотлар сони мақбуллаштирилди ва уларнинг аҳамияти оширилди. Эндиликда давлат мукофоти фақат ҳақиқатан ҳам муносиб инсонга топширилиши керак, деган тамойилга қатъий риоя қилиш зарур”, деди у.
Маросимда, шунингдек, турли соҳа вакиллари орден ва мукофотлар билан тақдирланди.
