3 апрель куни кечқурун АҚШда 2020 йилда ўлдирилган Ислом инқилоби қўриқчилари корпусининг (ИИҚК) “Ал-Қудс” элита бўлинмаси қўмондони, генерал-майор Қосим Сулаймонийнинг жияни – Ҳамида Сулаймоний Афшар ва унинг қизи ҳибсга олинди. Давлат котиби Марко Рубио уларни доимий қонуний резидент (LPR) мақомидан маҳрум қилди. Бу ҳақда АҚШ Давлат департаменти хабар берди.
Қайд этилишича, ҳозирда иккаласи ҳам АҚШ Иммиграция ва божхона хизмати (ICE) ҳибсхонасида сақланмоқда. Бундан ташқари, Афшарнинг турмуш ўртоғига АҚШга кириш тақиқланган. Давлат департаменти ОАВ хабарларига ва Афшарнинг ижтимоий тармоқлардаги, хусусан, Instagram’даги изоҳларига таяниб, уни Эроннинг “тоталитар, террорчи режими” тарафдори деб атамоқда ва уни режим тарғиботида айбламоқда.
“АҚШда яшаб у Эрон режимини тарғиб қилган, Яқин Шарқдаги Америка аскарлари ва ҳарбий объектларига қилинган ҳужумларни нишонлаган, Эроннинг янги Олий раҳнамосини улуғлаган, Американи “Буюк шайтон” деб атаган ва террорчи ташкилот деб тан олинган Ислом инқилоби қўриқчилари корпусини сўзсиз қўллаб-қувватлашини билдирган. Афшар Сулаймоний яқинда ўчирилган Instagram аккаунтидаги тез-тез жойлаб турган постларидан кўриниб турганидек, Лос-Анжелесда ҳашаматли ҳаёт кечириб, Эрон террорчи режими манфаати йўлида ушбу тарғиботни олиб борган”, дейилади хабарда.
Маълумот учун, Қосим Сулаймоний ИИҚКнинг хорижий операциялар учун масъул бўлган “Ал-Қудс” махсус кучлари бўлинмасига раҳбарлик қилган.
