Ижтимоий тармоқларда Тошкент шаҳрида бир нечта фуқаролар ўзаро жанжаллашгани акс этган видео тарқалиб, турли муҳокамаларга сабаб бўлди. Мазкур ҳолат юзасидан пойтахт Ички ишлар бош бошқармаси муносабат билдирди.
Қайд этилишича, Учтепа тумани Заргарлик кўчасида саккиз нафар фуқаро ўзаро жанжаллашиб, жамиятда юриш-туриш қоидаларини қасддан менсимасдан жамоат тартибини бузган. Ҳолат юзасидан олиб борилган суриштирув ишлари натижасида фуқароларнинг шахсига аниқлик киритилган. Улар процессуал тартибда ушланиб, ҳужжатлар расмийлаштирилган ва Учтепа тумани Ички ишлар органлари фаолиятини мувофиқлаштириш бошқармасининг навбатчилик қисмига топширилган.
“Бешта оғайним билан келдим, булар ҳам келди. Гаплашдик, шу ўзаро зиддият бўлиб, озроқ муаммо бўлиб қолди. Ўзим кутмаган нарсалар бўлиб кетди. Қилган ишимиздан афсусдаман. Ҳеч кимга бунақа урушиш, кўчада безорилик қилишни тавсия бермайман. Давлатимиздан, ходимларимиздан кечиришларини сўраймиз, бошқа бунақа ҳолат бўлмайди”, дейди жанжал иштирокчиларидан бири.
Билдирилишича, мазкур ҳолат юзасидан Жиноят кодексининг 277-моддаси, яъни безорилик билан жиноят иши қўзғатилган. Тергов ҳаракатлари давом этмоқда.
