Буюк Британия парламенти “Тамаки маҳсулотлари ва вейплар тўғрисида”ги қонунни (Tobacco and Vapes Bill) якуний тарзда тасдиқлади. Унга кўра, 2009 йил 1 январда ёки ундан кейин туғилган барча фуқаролар учун сигарет сотилишига умрбод тақиқ жорий этилди. Бу ҳақда “The Independent” нашри хабар берди.
Ушбу қонун ҳужжати ҳозирда 17 ёш ва ундан кичик бўлган фуқароларнинг тамаки маҳсулотларидан фойдаланиш имкониятини бутунлай ёпиш орқали “чекишдан холи авлод” яратишга қаратилган. Қонун қироллик санкциясини (тасдиғини) олганидан сўнг, вазирларга тамаки, вейпинг ва таркибида никотин бўлган маҳсулотларни, жумладан, уларнинг таъм қўшимчалари ва қадоқларини тартибга солиш бўйича янги ваколатлар беради.
Буюк Британия соғлиқни сақлаш вазири ушбу ҳужжатни “тарихий” ва “бир авлод давридаги жамоат саломатлигига қилинган энг йирик аралашув” деб атаган ҳамда бу кўплаб инсонлар ҳаётини сақлаб қолишини таъкидлаган. Тақиқнинг бизнесга таъсири ҳақидаги саволга вазир, ҳукумат салбий оқибатларни минималлаштириш учун савдо вакиллари билан яқин ҳамкорлик қилаётганини айтган.
Маълумот учун, қонун лойиҳаси Буюк Британиянинг чекишга қарши кўп йиллик сиёсатининг мантиқий давоми бўлди. Мамлакат аллақачон тамаки рекламасига қатъий чекловлар, мажбурий “оддий” (рекламасиз) қадоқлаш ва сигарет сотиб олиш учун ёш чегарасини ошириш каби чораларни жорий этган.
