Таиланд пойтахти Бангкокдаги “Rong Beer Na Lat Phrao” барида содир бўлган ёнғин оқибатида камида 27 киши ҳалок бўлди, яна 63 киши турли даражадаги тан жароҳатлари олди. Бу ҳақда “Reuters” хабар берди.
Қайд этилишича, ҳодиса кеча, 13 июлга ўтар кечаси Бангкокнинг шимолий қисмида жойлашган “Rong Beer Na Lat Phrao” барида юз берган. Ёнғиндан кейин 22 нафар жабрланувчи оғир аҳволда шифохонага ётқизилган.
Расмийларнинг билдиришича, ёнғин шифтдаги кондиционер тизимида юзага келган қисқа туташув сабаб бошланган. Аланга тез тарқалиб, бино ичини қалин тутун қоплаган.
“Барда иккита фавқулодда чиқиш йўли бор эди. Улардан бири ошхона ёнида бўлиб, йўли пиво қутилари билан, иккинчиси эса стол билан тўсиб қўйилгани сабабли эвакуация қийинлашди. Ҳодиса сабабларини аниқлаш учун суд-тиббиёт экспертларининг хулосасини кутишимиз керак”, деди Бангкок губернатори Чадчарт Ситтипунт.
Оқибатда кўплаб одамлар орқа томондаги ошхона ва ҳожатхона томон қочишга мажбур бўлганини қўшимча қилди губернатор.
“Биз қутқарув ва қидирув гуруҳини ичкарига юбордик ва ҳожатхонада кўплаб одамлар борлигини аниқладик. Уларнинг аксарияти аланга бинонинг олд қисмида эканини кўриб, орқа томонга қочишга уринган”, деди ўт ўчирувчи Чакрит Хонгком.
Гувоҳларнинг сўзларига кўра, ёнғин бошлангач, ичкарида ваҳима юзага келган. Дастлаб куйган ҳид сезилган, орадан кўп ўтмай эса шифт ёнаётгани кўринган. Товушни ютиш учун ўрнатилган кўпикли шифт қопламаларининг қулаб тушиши оқибатида айрим ташриф буюрувчилар жароҳат олган.
Ҳозирда суд-тиббиёт экспертлари ва тергов органлари ёнғин сабабларини ҳамда фавқулодда чиқиш йўлларининг нега беркитиб қўйилганини аниқлаш бўйича тергов олиб бормоқда.
