Фарғона вилояти Учкўприк туманида спиртли ичимлик истеъмол қилиш оқибатида келиб чиққан можаро қотиллик билан якунланди. Жиноят ишлари бўйича туман суди ҳукми билан ўз қайнотасининг умрига зомин бўлган шахс 8 йилга қамалди. Бу ҳақда “Замон” дастурида маълум қилинди.
Эркак ўз уйида қайнотаси билан спиртли ичимлик истеъмол қилган. Суҳбат чоғида қайнота куёвининг қизини — ўзининг набирасини ёмон хулқли қизларга қиёслагани сабабли улар ўртасида тортишув келиб чиққан. Жанжал вақтида ғазабини жиловлай олмаган эркак қайнотасининг юз қисмига қўллари ва пешонаси билан уриб, боши ҳамда юзига оёқлари билан қаттиқ тепган.
Оқибатда оғир тан жароҳатлари олган эркак шифохонага ётқизилган, бироқ кўрсатилган тиббий муолажаларга қарамай, орадан 18 кун ўтиб вафот этган.
Мазкур ҳолат юзасидан қўзғатилган жиноят иши судда кўриб чиқилди. Суд ҳукмига кўра, эркак Жиноят кодексининг 104-моддаси (қасддан баданга оғир шикаст етказиш) 3-қисмининг “д” бандида назарда тутилган жиноятни содир этганликда айбдор деб топилди. Унга нисбатан 8 йил муддатга озодликдан маҳрум қилиш жазоси тайинланди.
