Сенегал миллий терма жамоаси ҳужумчиси Садио Мане терма жамоадаги фаолиятини якунлаганини маълум қилди. Бу ҳақда “Le Quotidien” нашри хабар берди.
“Билингки, мен бу байроқ учун ҳамма нарсани қурбон қилдим. Мен боримни бердим ва ҳар доим мамлакатимиз шарафи учун аямай курашдим”, дейди Мане.
34 ёшли ҳужумчи Сенегал терма жамоаси сафида 130 та учрашувда майдонга тушиб, 54 та гол урди ва мамлакат тарихидаги энг яхши тўпурарга айланди. У миллий жамоа билан 2021 йилги Африка Миллатлар Кубогида чемпионликни қўлга киритди. Шунингдек, 2019 ва 2026 йилги мусобақаларда кумуш медалларни қўлга киритган.
Мане 2023 йилдан буён Саудия Арабистонининг “Ал-Наср” клубида тўп суриб келади ва 2026 йилги мамлакат чемпионатида ғолиб чиққан. Унинг клуб фаолияти Франциянинг “Мец”, Австриянинг “Зальцбург”, Англиянинг “Саутгемптон” ва “Ливерпуль”, шунингдек, Германиянинг “Бавария” клублари билан боғлиқ.
Маълумот учун, 2026 йилги Жаҳон чемпионатида Сенегал миллий терма жамоаси 1/16 финал босқичида Бельгияга 2:3 ҳисобида мағлуб бўлиб, мусобақадаги иштирокини якунлаганди.
