FIFA АҚШ, Канада ва Мексикада бўлиб ўтадиган 2026 йилги футбол бўйича Жаҳон чемпионати томошабинлар тажрибасини тубдан ўзгартириши кутилаётган икки катта янгиликни тақдим этади. Бу ҳақда “The Times” нашри хабар берди.
Манбага кўра, Жаҳон чемпионати финал учрашувида Америка Суперкубогидан илҳомланган махсус танаффус шоуси намойиш этилади. Шунингдек, FIFA ОАВ учун янгиланган, янада қатъий қоидаларни жорий қилган. Унга кўра, мураббийлар ва футболчилар ўйинлар вақтида, яъни биринчи бўлим якунлангач мажбурий телеинтервью беришлари лозим.
Танаффус шоуси ҳақидаги эълон Вашингтонда бўлиб ўтган қуръа ташлаш маросимида берилди. FIFA Америка анъанасини жаҳон футболига олиб киришини тасдиқлади. Бундай тадбирлар АҚШ миллий футбол лигаси (NFL) танаффусларида кузатилади.
FIFA бу форматни 2025 йилги Клублар ўртасидаги жаҳон чемпионати финалида Жей Бальвин, Дожа Кайт ва Coldplay каби санъаткорларнинг чиқиши билан синаб кўрган ва бу томошабинлар орасида катта қизиқиш уйғотган ва ижтимоий тармоқларда юқори фаоллик қайд этилган.
Шунингдек, 2026 йилги мундиалда ҳар икки жамоа футболчилари ва мураббийлари биринчи тайм тугаши билан дарҳол телеинтервью бериши шарт бўлади. Худди шу амалиёт ўйин якунида ҳам такрорланади: ҳар бир жамоа интервью учун ўз вакилларини тақдим этиши мажбурий. Бундан ташқари, ҳар бир жамоа ўйиндан икки кун олдин матбуот анжумани ўтказиши белгиланган бўлиб, бу шаффофликни ошириш ва медиа билан мулоқотни кучайтиришга қаратилган. Ушбу ўзгаришлар футболни кўнгилочар саноат элементлари билан уйғунлаштириш, шунингдек, мухлисларни футболчилар ва мураббийларга янада яқинлаштириш мақсадида жорий қилинмоқда.
