Тошкент шаҳрида 6,5 млн доллар қийматдаги криптоактивларни ноқонуний айлантирган йигит ушланди. Бу ҳақда Ички ишлар вазирлиги хабар берди.
Маълум бўлишича, Миробод туманида жойлашган манзилда мазкур жиноий фаолиятга алоқадор бўлган 2003 йилда туғилган А. исмли шахс қўлга олинган. Шундан сўнг унинг вақтинчалик яшаш манзили кўздан кечирилган. Уй ичидан бир нечта мобиль телефонлар, ноутбук, банк пластик карталари ҳамда SIM-карта процессуал тартибда расмийлаштирилиб олинган.
Хабарда айтилишича, гумонланувчи мазкур ноқонуний фаолиятни хорижда ўрганиб, Ўзбекистон ҳудудида мустақил равишда ташкил этган. Унинг электрон қурилмалари текширилганда 2025 йил февраль ойидан 2026 йил март ойига қадар у махсус платформа орқали жами 6,5 миллион USDT дан ортиқ миқдордаги криптоактивларни ноқонуний айлантиргани аниқланган.
Мазкур ҳолат юзасидан Жиноят кодексининг 278-8-моддаси билан жиноят иши қўзғатилган.
