Тошкент вилояти Ангрен шаҳрида юк машинаси иштирокида содир бўлган ЙТҲда икки киши ҳалок бўлиб, 4 киши жароҳатланди. Бу ҳақда вилоят ИИББ матбуот хизмати хабар берди.
26 апрель куни соат 23:10 ларда, А-373 автомобиль йўлининг 93-километрида Howo русумли юк машинаси ҳайдовчиси (1995 йилда туғилган) Р.Н. ҳаракат вақтида бошқарувини йўқотиб, шу йўналишдаги 4 та транспорт воситалари билан тўқнашган.
Ҳодиса оқибатида Cobalt’да бўлган икки нафар фуқаро — ҳайдовчи И.X. (1975 йилда туғилган) ҳамда йўловчи З.Т. (1986 йилда туғилган.) воқеа жойида ҳалок бўлган. Қолган транспорт воситаларида бўлган 4 нафар фуқаро турли даражадаги тан жароҳатлари билан тиббиёт бирлашмасига олиб борилган.
Ижтимоий тармоқларда тарқалган видеоларда бир неча транспорт воситалари аянчли ҳолга келгани, юк машинаси ағдарилиб, унинг остида автомобиль қолиб кетганини кўриш мумкин.
Ҳозирда ҳолат юзасидан Тошкент вилояти ИИББ ҳузуридаги Тергов бошқармаси томонидан Жиноят кодексининг 266-моддаси 3-қисми “а” банди билан (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) жиноят иши қўзғатилиб Howo юк машинаси ҳайдовчиси процессуал тартибда ушланган. У ҳодисада тан жароҳати олмаган.
