Боливиянинг тоғли ўрмонларида илгари фанга номаълум бўлган янги ёввойи мушук аниқланди. Бу билан ллимлар сўнгги юз йилда илк марта мушуксимонларнинг янги турини расман рўйхатдан ўтказди. Бу ҳақда Reuters хабар берди.
Маҳаллий аҳоли томонидан Тилкаё деб аталадиган бу жонивор Жанубий Американинг кўп қисмида учрайдиган йўлбарс мушуклар гуруҳига киради. Тадқиқотчиларнинг сўзларига кўра, у Боливиянинг Юнгас ўрмонида топилган. Бу ҳудуд булутлар билан қопланган ва ҳавоси жуда нам бўлган тоғли ўрмон ҳисобланади.
Янги тур тахминан 46 сантиметр узунликка ва 1,4 килограмм вазнга эга. Бу кўрсаткич билан уни оддий хонаки мушукдан ҳам кичикроқ деса бўлади. Тадқиқотчилар генетика маълумотларидан фойдаланиб, бу жонивор янги тур эканини тасдиқлади. Уникал илмий ном сифатида Leopardus tilcayo берилди ва унинг маҳаллий номи сақлаб қолинди.
Ўрганилган янги тур ҳақидаги мақола 17 сентябрь куни Current Biology журналида чоп этилди. Мақола муаллифларидан бири, National Geographic тадқиқотчиси Паола Ногалес-Аскаррунснинг таъкидлашича, мушукнинг мўйнаси оч жигарранг бўлиб, танасида леопардники каби доғлар бор.
Ҳозирча бу мушукнинг биологияси ва турмуш тарзи ҳақида маълумотлар кам. Ахлат намуналарида кичик кемирувчилар қолдиқлари топилган. Бу уларнинг рационининг бир қисми бўлиши мумкин. Фотоқопқонлар эса жониворнинг тунда фаолроқ бўлишини кўрсатган.
Бельгиянинг Антверпен университети эволюцион биологи ва тадқиқот ҳаммуаллифи Ёнас Лескроартнинг айтишича, йўлбарс мушуклар сирли турлардандир. Яъни уларни фақат ташқи кўринишидан бир-биридан ажратиш қийин.
Илгари йўлбарс мушуклар бир тур деб ҳисобланган. Бироқ ўн йиллар аввал ўтказилган генетик тадқиқотлар бир нечта турлар мавжудлигини кўрсатган эди.
Бутунлай бошқа жонивор
Ногалес-Аскаррунснинг сўзларига кўра, Боливиядаги бу мушукни кузатиш катта қизиқиш уйғотган. Чунки унинг хусусиятлари Бразилия мушукларида учрамайди. Олимлар жамоаси Жанубий Американинг бир нечта мамлакатидан тўпланган 38 та мушукнинг ДНКсини таҳлил қилди. Улар орасида музейларга тегишли 8 та намуна ҳам бор эди. Тадқиқот йўлбарс мушуклар аслида ирсий жиҳатдан фарқ қилувчи 5 та алоҳида тур эканини кўрсатди.
Лескроарт бу Боливия йўлбарс мушуги алоҳида тур бўлиб чиқишини ҳеч ким кутмаганини айтди. Генетик таҳлиллар Тилкаё насли бошқа йўлбарс мушуклардан тахминан 1,4 миллион йил аввал ажралиб чиққанини кўрсатди.
