Tesla Остин шаҳрида икки ўриндиқли Cybercab роботаксиси орқали чекланган ҳудудларда ҳайдовчисиз саёҳат хизматини таклиф қила бошлади.
АҚШ Миллий автомобиль йўллари ҳаракати хавфсизлиги бошқармаси (NHTSA) Tesla’нинг янги хизматини баҳолаётганини маълум қилди.
Tesla бош директори Илон Маск Cybercab компаниянинг ҳайдовчисиз транспорт бозорида етакчи кучга айланишида муҳим ўрин тутишини айтган. Компания келажакда рул ва педалларга эга бўлмаган ушбу автомобилларни кенг роботакси тармоғининг асосий воситасига айлантиришни режалаштирмоқда.
Ҳозирча Cybercab хизматидан фойдаланиш Остиннинг айрим ҳудудлари билан чекланган. Компания йўл ҳақи миқдорини аниқ эълон қилмаган, бироқ талабга қараб динамик нарх белгилаш тизимидан фойдаланишини билдирган.
Tesla’нинг Остиндаги роботакси паркида ҳозир 45 та Cybercab бор. Умуман, Техасда 420 та автоном автомобиль рўйхатдан ўтган. Бу кўрсаткич ҳайдовчисиз такси бозори етакчиси бўлган Waymo’нинг 988 та автомобилидан анча кам.
Маск бир неча йилдан бери Tesla’нинг тўлиқ ҳайдовчисиз автомобиллари яқин орада йўлга чиқишини таъкидлаб келган. Бироқ компаниянинг роботакси режалари аввалги прогнозлардан секинроқ амалга ошмоқда.
Reuters журналистлари аввалроқ Техасдаги Tesla роботакси хизматини синаб кўриб, айрим ҳудудларда узоқ кутиш вақтлари ва хизмат кўрсатишдаги муаммоларни қайд этган.
Маскнинг айтишича, келажакда Cybercab Tesla’нинг энг кўп ишлаб чиқариладиган автомобилига айланиши ва компаниянинг глобал роботакси тармоғини таъминлаши мумкин.
