Венесуэла президенти Николас Мадуро АҚШ билан кескинлик кучайиб бораётгани сабабли Колумбия ҳарбийларини бирлашишга чақирди. Бу ҳақда TRT хабар берди.
Мадуронинг сўзларига кўра, минтақавий “иттифоқ” тинчлик ва суверенитетнинг энг кучли кафолати ҳисобланади. У Колумбия ҳарбийларини Венесуэлага ташқи аралашувни тўхтатиш учун ёрдам беришга чақирди.
“Мен уларни Венесуэла билан мукаммал иттифоқ тузишга чақираман токи ҳеч ким мамлакатларимиз суверенитетига дахл қилмасин”, деди у.
Мурожаат Вашингтоннинг бир қатор қарама-қарши баёнотларидан сўнг эълон қилинди. Жумладан, АҚШ президенти Дональд Трамп 17 декабрь куни санкциялар остидаги барча нефть танкерларининг Венесуэлага кириши ва ундан чиқишига “тўлиқ ва мутлақ” блокада жорий этишни буюрди.
У Венесуэла ҳукуматини “хорижий террорчи ташкилот” деб эълон қилди. Трамп буни мамлакат “АҚШ бойликларини ўғирлагани, терроризм, гиёҳванд моддалар контрабандаси ва одам савдосига алоқадор экани” билан изоҳлади. Венесуэла президенти бу баёнотга муносабат билдириб, Трампни “мустамлакачилик” амбицияларини яширганликда айблади. Шунингдек, АҚШ президентини “қоғирчоқ ҳукумат” ўрнатишга уринаётганликда айблади.
“Мақсад — бир неча кун ҳам яшамайдиган қўғирчоқ ҳукуматни ўрнатиш ва Конституциямиз ҳамда бойликларимизни топшириб юбориш. Венесуэла бундай уринишларга қарши туради”, деди Мадуро.
АҚШ ҳарбийлари сентябрь ойидан бери Венесуэла яқинидаги Тинч океанининг шарқий қисми ва Кариб денгизида ўнлаб кемаларга ҳужум қилиб, камида 90 кишини ўлдирди. Бу ҳаракатлар халқаро ҳуқуқ экспертлари томонидан “суддан ташқари қотиллик” сифатида танқид қилинди. Вашингтон кемаларни гиёҳванд моддалар савдоси билан шуғулланганликда айблади, аммо ўз даъволарини тасдиқлаш учун ҳеч қандай далил келтирмади.
Венесуэла узоқ вақтдан бери АҚШ ҳарбийларининг минтақага жойлаштирилишини “Венесуэланинг улкан нефть ва газ бойликларини эгаллашга уриниш”, дея баҳолаб келади.
Дунёдаги энг катта тасдиқланган нефть захираларига эга бўлишига қарамай, Венесуэла Трампнинг илк президентлиги даврида жорий этилган АҚШ санкциялари сабабли сўнгги йилларда экспорт бўйича кескин чекловларга дуч келган.
