Туркия президенти Ражаб Тоййиб Эрдўғон 28 октябрь куни мамлакатда ишлаб чиқилган илк Алтай жанговар танкларини армияга топширди. У бу воқеани “мудофаа саноатида мустақил Туркиянинг янги даври” деб атади. Бу ҳақда Daily Sabah хабар берди.
Танклар Анқарадаги БМC заводида ишлаб чиқарилади. Ҳар ойда 8 та, йилига 96 та Алтай танки ишлаб чиқариш режалаштирилган. 28 октябрь куни 3 та танк армияга топширилган бўлса, жами 250 дона (85 таси Т1, 165 таси Т2 версияда) техника фойдаланишга топширилиши кутилмоқда. Завод ҳар ойда 10 та Алтуğ 8х8 зирҳли машинасини ҳам ишлаб чиқаришни мақсад қилган.
Алтай танкининг асосий техник хусусиятлари:
— максимал тезлиги: 65 километр/соат (йўл шароитида);
— йўлдан ташқарида тезлиги: 45 километр/соат;
— двигатель қуввати: 1500 от кучи;
— двигатель тури: 12 цилиндрли, электрон бошқарувли дизель;
— трансмиссия: 6 олдинга, 3 орқага автоматик узатма;
— экипаж: 4 киши (қўмондон, мерган, юкловчи, ҳайдовчи);
— тоғга чиқиш имконияти: 60 фоизгача қияликда;
— ёнбошлаб ҳаракатланиш: 30 фоизгача нишабликда.
Танк замонавий жанг шароитига мослаштирилган бўлиб, лазер масофа ўлчагич, стабилизацияланган нишон тизими ва рақамли бошқарув технологиялари билан жиҳозланган. Эрдўғон Туркия ҳозирда дунёда 11-ўриндаги йирик мудофаа экспортчиси эканини, 2024-йилда глобал дрон экспортининг 65 фоизи Туркияга тўғри келганини таъкидлаган.
“Энди биз қурол сотиб олувчи эмас, ўз технологиясини яратиб, дунёга таклиф этувчи давлатмиз”, деган Эрдўған ўз нутқи давомида.
НАТОнинг иккинчи йирик армиясига эга бўлишига қарамай, Туркия ўтмишда иттифоқчилари томонидан кўпинча қурол эмбаргосига дуч келган. Бу уни сўнгги йигирма йил ичида ички имкониятларни сезиларли даражада ошириш ва ташқи қарамликни чеклашга ундаган.
“Ўтган 23 йил давомида, айниқса, мудофаа саноати, дипломатия ва хавфсизлик соҳаларида қўйган қадамларимиз орқали биз Туркияни эътиборсиз қолдириб бўлмайдиган мамлакатга айлантирдик. Замонавий ҳаво, қуруқлик ва денгиз транспорт воситалари билан биз тарихнинг янги саҳифасини ёзишда давом этмоқдамиз”, деган Туркия президенти.
