Туркия хавфсизлик кучлари Бирлашган Араб Амирликлари (БАА) разведка хизмати учун ишлаганликда гумон қилинган уч кишини ҳибсга олди. Бу ҳақда The Middle East Eye хабар берди.
Истанбул Бош прокуратурасининг 25 ноябрь куни берган баёнотига кўра, гумонланувчилар Туркиянинг мобил алоқа рақамидан фойдаланган ҳолда мамлакатдаги муҳим давлат идораларида ишлайдиган ходимлар ҳақида шахсий маълумотларни тўплашга уринган.
“БАА разведка хизмати аъзолари Туркияда фаолият юритувчи GSМ (мобил алоқа) компаниясидан рақам олиб, сохта профиллар орқали мамлакатимиздаги муҳим лавозимларда ишлайдиган ходимлар ҳақида биографик маълумотлар тўплашга урингани аниқланди. Жосуслар нишонида мудофаа саноати ташкилотлари раҳбарлари, Ташқи ишлар вазирлиги томонидан ишлатиладиган телефон линияси ва айрим хорижий давлатларнинг расмий вакиллари бўлган”, дейилади баёнотда.
Ҳукумат БААга жосуслик қилишда 4 нафар шахсни аниқлаб, 3 кишини ҳибcга олган. Сабаби қолган 1 нафар шахс Туркия ҳудудида эмаслиги аниқланган.
“Жиноятга алоқадор гумонланувчиларни қўлга олиш ва далилларни мусодара қилиш мақсадида бугун ўтказилган операция натижасида уч нафар гумонланувчи ҳибсга олинди. Яна бир гумонланувчи эса чет элда бўлгани учун унга нисбатан қамоққа олиш учун ордер берилди”, дейилади прокуратура баёнотида.
Муносабатлар кескинлашуви
Туркия ва БАА “Араб баҳори” қўзғолонлари туфайли юзага келган минтақавий ва икки томонлама келишмовчиликларни ҳал қилиш бўйича кенг кўламли музокаралардан сўнг, 2021-йилда алоқаларини тиклаган эди. Шундан сўнг муносабатлар эркин савдо шартномаси ва инвестиция битими билан мустаҳкамланган ва юқори мартабали амалдорларнинг тез-тез ташрифлари амалга оширилган.
Бироқ, сўнгги ойларда Судандаги уруш икки давлат ўртасидаги кескинликни яна қайта жонлантирган. БАА Судандаги ҳарбийлаштирилган “Тезкор ёрдам кучлари” (РСФ) жангариларини қўллаб-қувватлайди. РСФга қарши турувчи Судан армияси эса сўнгги бир йил ичида Анқара билан ҳамкорликни кучайтирган.
